SHILLONG: Poraiani gadang donggipa manderang chu·onga gita dongengoba sorkarini primary skulrango skigiparangko rakkijaengani gimin Sonibar salo, a·dokni Opposition Trinamool Congress (TMC) Meghalaya dol, a·dok sorkariko matnangataha.
“Chu·onga gita poraiani gadang donggipa aro kamna kragipa skigiparang a·doko bang·en dongengoba maini gimin sorkari primary skulrango skigiparangko ra·jaenga,” ine Opposition dolni dilgipa Mukul Sangma sing·doangaha.
Sangma-ni parakatani gitade, ia primary skulrango skigiparangko rakkijae sorkari, songadam nokadamrango donggipa bi·sarangna a·gilsakni seng·aniko on·ja gita ong·engachim.
Adita salrangna skangsan, Assembly-ni Autumn Session-ko ong·atanio a·dokni Education Minister Lahkmen Rymbui, Meghalaya a·dok gimiko skigiparang donggijagipa dam 36 lower primary skulrang donga ine parakatahachim.
Education Minister-ni parakatani gitade, skigipa gri ong·enggipa skulrangoni dam 16 LP skulde South Garo Hills-o, dam 10-de East Garo Hills-o, dam 5-de Khasi Hills jolrango aro dam 4-de Jaintia Hills a·jarango ong·engachim.
Ia skulrango skigiparang dongjani gimin talataniko on·angengon, skigiparang mitamde kamoni neng·takaha, mitamde gipin biapona transfer ra·angaha aro mitamde kamtangtangko watahani a·selsa ia skulrango skigiparang dongjaenga ine Education Minister parakatahachim.
Meghalaya High Court-ni gital ge·etaniko on·ani ja·man Education department, roster system-ko tarina nangaha aro uandaken batanggimin changoba skigiparangko ra·ani somoio neng·nikanirangko chagrongna nangaha ineba Education Minister parakataha.
Skulrango skigiparang dongjae chatro chatrirang neng·nikanirangko man·na nangtokengani gimin ia skulrango chatro chatrirangna dontonggija lekka porako on·na man·na gita skigiparangko contract basis-o rakkiskachina TMC-ni sakgipin MLA Zenith Sangma dabiangaha.