TURA: Pangna bilsi ong·atrongenggipa 100 Drums Wangala manianiko ia bilsioba November 10 tarikoni 12 tarikona, West Garo Hills a·jani Chibragre-o donggipa Wangala A·dam-o ong·atangtaigen ine u·iataha.
Ia chang 46-gipa 100 Drums Wangala manianio bak ra·na sienggipa dolrang, form-rangko Hundred Drums Wangala Festival Committee-ni chairman aro secretary-oniko ra·ena gita man·gen ineba u·iataha.
Re·anggipa bilsio jekai ia 100 Drums Wangala manianio Contemporary Folk Song Competition ba A·chikrangni ring·anirang jekai Harara, Nanggorere, Do·rimitko Nikoba, Serejing Wal·jan, Sonatchi Boiar aro uandakgipa ring·susaaniko ong·atangahachim ia changoba apsan daken ring·susaaniko ong·atangtaigen ine kobor on·timgiparang parakataha.
Ia 100 Drums Wangala manianiko re·anggipa 2020 bilsionin Asanang-oniko apjitbae da·o bilsiantian Wangala A·dam Chibragre-o ong·atskaengahachim.
Bilsi gimiko game ge·e man·gipa mi misina pattigipa ra·rongipa Misi Saljong-ko mittelpilani gita bilsiantian A·chikrang Wangala manianiko dakronga aro uandaken ia dama bol 100 doke Wangala manianiko batanggimin ru·uta bilsirangonin A·chikrang ku·cholsan ong·e manirongbaengachim.
