TURA: Tuberculosis (TB) sagiparangko an·seng baljoke rakkina gita Sonibar salo, West Garo Hills a·jani District TB Office-ni gita TB sagiparangna, dal, chana, nutrela aro protein biscuit gita dakgipa cha·ani bosturangko suale on·angaha.
Ia cha·ani bosturangko, Phulbari CHC-ni ning·o kangal cholgri ong·e TB sagiparangna District TB Office-oni dolsa official-rang suale on·angaha aro ia cha·ani bosturangko Shyamnagar constituency-ni MDC Habibuz Zaman on·gilataha.
Ia cha·ani bosturangko TB sagiparangna jaantian bilsisana suale on·anggen ineba official-rang kobor on·aha.
Ia cha·ani bosturangko suale on·anggipa manderangara, District TB Officer Dr Litha Sangma, MOTC Phulbari unit-ni Dr Nehru Marak aro Health Services-ni Joint Director Dr Khona Sangma ong·a.
Meghalaya a·doko TB saaniko 2025 bilsini gisepon bon·atsrangna miksonganio National Tuberculosis Elimination Program-ko ra·gatahachim aro ia program-ni ning·o, TB sagiparangna namgipa cha·anirangko on·e dakchakna gita adita salrangna skangsan ‘Pradhan Mantri TB Mukt Bharat Abhiyan’-ko a·songni President Droupadi Murmu, a·bachengate on·angahachim.
TB sagiparangna cha·ani bosturangko suale on·na gita program-ko ong·atanio West Garo Hills a·jani District TB Officer Dr Litha Sangma aganprakatengon, TB saaniko warachakanio namgipa cha·anirangko cha·e an·tangtangko bilake rakkichina gita TB sagiparangko didiataha. TB saaniara sanna man·gipa ong·ani gimin chu·gimik nampilna gita samrangko somoi gita ringjringchinaba ua TB sagiparangko didiangaha.