SHILLONG: Meghalaya aro Assam a·dokni gisepo meligrikna man·jaenggipa bangki simarangko namatna a·dok damgnini sorkarirang kamrangko ka·chakatengahaon, da·o bangki dongkuenggipa damdok biaprangni gimin am·sandina gita Meghalaya sorkari, dolgittam regional committee-rangko songe donangaha.
Ia dolgittam regional committee-rango Khasi Hills Autonomous District Council aro Jaintia Hills Autonomous District Council-ni CEM-rangko aro EM-rangkoba membor dake songe donchapangaha.
Iani bidingo Home (Political) department-oni u·iataniko on·atani gitade, ia dolgittam regional committee-rang, Langpih (West Khasi Hills), Borduar, Nongwah-Mawtamur, Desh Doomreah aro Block-II (Ri-Bhoi) aro Block-I baksana Psiar-Khanduli (West Jaintia Hills)-ni gimin am·sandianirangko dakanggen.
Official-rangni u·iatani gitade, Meghalaya a·dokni Deputy Chief Minister Prestone Tynsong, Ri Bhoi district regional committee-ni chairman ong·gen, Cabinet Minister Renikton Lyngdoh Tongkhar, West Khasi Hills district regional committee-ni chairman ong·skagen aro sakgipin Cabinet Minister Saniawbhalang Dhar, West Jaintia Hills district regional committee-ni chairman ong·e dilangskagen.
Ri Bhoi district regional committee-ni membor-na a·dokni Cabinet Minister Dasakhiatbha Lamare, Nongpoh-ni MLA Mayralborn Syiem, KHADC-ni Executive Member (Elaka) Jambor War aro Umroi-ni MDC Rangkynsai Kharbuki-ko seokaha, West Khasi Hills district regional committee-ni membor-na Nongstoin-ni MLA Macmillan Byrsat, Rambrai-Jyrngam-ni MLA Kimfa Sydney Marbaniang, KHADC-ni Deputy CEM Gigur Myrthong aro Rambrai-Jyrngam-ni MDC Bajop Pyngrope-ko seokaha aro West Jaintia Hills district regional committee-ni membor-na a·dokni Home Minister Lahkmen Rymbui, Raliang-ni MLA Comingone Ymbon, Mookaiaw-ni MLA Nujorki Sungoh aro JHADC-ni CEM Thombor Shiwat-ko seokskaaha.
Ia dolgittam regional committee-o a·jatangtangni deputy commissioner-rang, membor convenor ong·e kamko ka·angskagen.
Meghalaya sorkarini songe donanggipa regional committee-rang, Assam sorkarini songe on·gipa regional committee-rang baksa agan-chanchirimgrike kamrangko ka·anggen ineba official-rang parakataha.
Ia regional committee-rang, janapgimin songrangona re·e, songni manderang baksa agan-chanchirimanirangko dakani ja·man aro pilak kamrangko matchotani ja·man sal 45-ni gisepo Meghalaya sorkarina report-ko on·gen ineba sorkari official-rang parakataha.
