SHILLONG: Meghalaya a·dokni skanggipa 5-Star Hotel – Taj Vivanta-ko re·baenggipa October jani 14 tariko nokdonggagnok ine a·dokni Chief Minister Conrad K Sangma parakataha.
“Taj Vivanta Hotel-ko October 14 tariko nokdonggana man·gnok. Taj Group-ni manderang, hotel-ko matchotatna gita somoiko ra·dapkuengani a·sel nokdonggaanio adita ja·manchakaha indiba uamang salbongaoni sal 10-mangni gitasan somoiko bi·dapaiaha,” ine Chief Minister, kobor ra·timgiparangna aganaha.
Chief Minister-ni parakatani gitade, ia hotel-o manderangko sokachakna skang, ka·sinsin hotel-ni kuturirangko aro gipin biaprangko kulichenggen.
Ia hotel-ara private dolnisa ong·ani gimin ia five-star hotel-ko India a·songni President, nokdonggae on·ejawa ineba Chief Minister talataniko on·angaha.
“Ian private company-chi chalaina sienggipa hotel-sa ong·ani gimin India a·songni President, ia biapona re·bae ia hotel-ko nokdonggae on·aniara kraani ong·jawa. Shillong-o bang·a program-rang ong·na siengani gimin chinga iandakgipa hotel-rangko ta·raken kulina nangenga. Manderangko sokachakna an·ching iandakgipa biaprangko bang·en nangkuenga,” ine Sangma aganaha.