Shillong All Faith Forum-ni tom·bimonganiko CPC sokachaka

SHILLONG: Shillong songjinmao Durga Puja-ko maniani bilsi 70 gapaniko maniani bak gita dingtang dingtang toromrangni nangrime bikotgipa Shillong All Faith Forum (SAFF)-ni chang 28-gipa tom·bimonganiko mijal Budbar salo Central Puja Committee (CPC)-ni gita Shillong songjinmani Kench’s Trace-o ong·atangaha.
Ia tom·bimonganiko ong·atanio a·dokni Chief Minister Conrad Sangma, mongsonggipa sokgipa ong·e jinmana aganprakangengon, ia program-ko ba tom·bimonganiko ong·atahani gimin CPC-ko mittelpilangenba, ia tom·bimonganio bakko ra·angahani gimin SAFF-ni member-rangkoba mittelpilangaha.
“Da·alo dingtang dingtang toromni manderang ia biapo apsan tom·chimonganiara dingtang dingtang jat aro toromni gisepo meli nangrime donganiko bilake sakki on·ani ong·aha,” ine Chief Minister parakataha.
Dingtang dingtang toromko dilgiparangni apsan tom·chimonganiara namgijako namachi cheaniko mesokan baksana ian dingtang dingtang jat aro toromni gisepo meli nangrime janggi tanganiko bilakbatatani ong·gen ineba ua aganaha.
Iana skang, CPC-ni president Naba Bhattacharjee-ba jinmana aganprakangengon, iandake dingtang dingtang toromni tom·bimonganiko 1993 bilsion a·bachengatahachim aro da·o changsataie iandake dingtang dingtang toromni tom·bimonganiko ong·ataniara Shillong songjinmao songdongenggipa dingtang dingtang jat aro toromni gisepo meli nangrime donganiko mesokani ong·enga ine parakataha.
Ia tom·bimonganio dingtang dingtang toromni dilgiparang, mikkangchiba apsan tom·tomao meli nangrime janggi tangangkuna gita apsan ku·mikchetanikoba dakangaha.