SHILLONG: Meghalaya a·doko gong kror 200-oni 300-mangona korosko chame a·dok sorkari, dam 2000-na baten gital skul nokrangko rikan baksana gitcham skulrangkoba taridapna miksongenga.
Iani bidingo kobor ra·timgipa manderang baksa agangrikengon, skul nokrangko gadangni kri sorkari rikna ba taridapna miksongenga ine Bristibar salo a·dokni Chief Minister Conrad K Sangma parakataha.
Chief Minister-ni parakatani gitade, gital nokrangko nangenggipa skulrangna sorkari, gong lak 48-mangko chame dongen aro taridapna nangenggipa dam 200-mangni gita skulrangba dongenga.
Mitam skulrangde dingtang dingtang obostarango ong·enga ine janapatengon, mitam skulrangnade gong lak gni ba lak gittammangko nanggen aro mitamnade gong lak bri ba lak bongamangko nangskagen ine Chief Minister parakataha.
“Skulrangko taridape on·na name nipiltaina nangenga aro chinga pilak skulrangko matchotna gita komibeoba gong kror 200-oni 300-mangona hisapenga,” ine Sangma aganaha.
Skulrango skigiparang chu·ongjaengani gimin janapatengon, skulrango skigiparangko chu·onga gita rakkina sorkari raken kamko ka·enga ine Chief Minister parakataha.
Batanggimin bilsibrini gisepo a·dok sorkari, sak 1300 skigiparangko temporary basis-o rakkiaha ineba ua parakataha.
“A·doko dam 14,000-mangni gita lower primary skulrang donga aro ia dam 14,000-oni dam 36-mangni gita LP skulrango skigiparang dongjaenga,” ine Sangma aganaha.
Skigiparangko rakkina gita sorkari porikkarangko ra·na a·bachengatahachim indiba court case-rang dongani a·sel porikkarangko ra·anio neng·nikanirangko chagrongna nangaha ineba Chief Minister parakataha.
“Uni gimin chinga ia neng·nikanirangko namatna jotton ka·enga aro anga ka·donga chinga pilak skulrangnan skigiparangko on·na man·gen,” ine Sangma aganaha.
Mitam skulrangode skigiparang bang·e poraigipa bi·sarang komiskaenga aro mitam skulrangode skigiparang komie poraigipa bi·sarang bang·batskaenga ine janapatengon, je skulrangon poraigipa bi·sarang komie skigiparang bang·achim, uandakgipa skulrangoniko sorkari, skigiparang ra·ongkate, poraienggipa bi·sarang bang·batgipa skulrango donatskagen ine Chief Minister parakataha.