Bi·sa bakgitchak aro ma·giparangni sianiko komiatna EGH-o tom·e chanchirima

WILLIAMNAGAR: Bi·sa bakgitchakrangni aro an·pakani ja·man ma·giparangni sianiko komiatan baksana nambata sanna bananirangko on·na man·na gita Health & Family Welfare-ni Principal Secretary Sampath Kumar aro Health & Family Welfare-ni Secretary RM Kurbah, East Garo Hills a·jani medical official-rang baksa dingtangmancha tom·e chanchirimanirangko dakangaha.
Ia tom·anio East Garo Hills a·jani Deputy Commissioner Jagdish Chelani aro dingtang dingtang department-ni officer-rangba dongpae bak ra·angaha.
Ia tom·anio Health & Family Welfare-ni Principal Secretary Sampath Kumar, East Garo Hills a·jani officer-rang baksa chanchirimengon, bi·sa atchiatani kamrangko nambate ka·na man·na gita jolo songdongenggipa manderang aro dingtang dingtang dolrang baksa nangrime kamko ka·china doctor-rangko aro gipin official-rangko didiangaha.
Apsan nangrime kamko ka·anichi bi·sa bakgitchakrangni sianiko aro an·pakani ja·man me·chikrangni sianiko komiatna man·gen ineba Kumar aganaha.
Songo noko bi·sa bakgitchakrangni sianiko aro an·pakani ja·man ma·giparangni siani a·selrangko ma·sie ra·na gita Health & Family Welfare Department-ni Principal Secretary aro Secretary, a·jani official-rang baksa Sokadam Agalgre aro Asil sub-centre-onaba re·angaha.
Ia songrangona re·ange songni manderang baksa agangrikengon, an·pakenggipa me·chikrangna sorkarini ra·gatgipa Chief Minister’s Safe Motherhood Scheme (CMSMS)-ni giminba health official-rang, agan-talate on·angjolaha aro ia scheme-ko an·tangtangni namgnina ra·china gita songni manderangko didiangaha.
Ia songrangona re·ange grongeanio dongpae bak ra·anggipa gipin manderangara, East Garo Hills a·jani Deputy Commissioner Jagdish Chelani, DHS (MCH&FW) Dr L Challam, Songsak Block-ni BDO Rikrak N Marak, DMHO Dr Ivory Sangma aro gipin officer-rang ong·a.