TURA: Meghalaya a·dokni SSA skulrango skigiparang, re·anggipa June jaoni September jaona kingking jabrini dormaharangko man·tokkujaengani gimin All Garo Hills SSA School Teachers Association (AGHSSASTA), a·songni Prime Minister Narendra Modi-na sedoataha.
Iani bidingo a·songni Prime Minister-na badi ka·e sedoatengon, SSA skulrango skigiparangna, re·anggipa 2016-17 bilsini bangki dongenggipa jachetni arrear-rang baksana skigiparangni dormaharangko on·na gita ma·mong sorkari, tangka paisarangko watatmanahachim indiba Meghalaya sorkari, SSA skigiparangna jabrini dormaha baksana jachetni arrear-rangko on·chipkujaenga ine AGHSSASTA-ni publicity secretary Bunbunbirth R Marak parakataha.
“SSA skigiparangna somoi gita dormaharangko on·china chinga changni chang a·dokni chief minister aro education minister-ko gronge mol·molahachim indiba sorkari, skigiparangni dormaharangko somoi gita on·na gisik nangjaenga,” ineba AGHSSASTA, a·songni Prime Minister-na badi ka·doataha.
Da·o Hindurangni manigipa Durga Puja sokbaengahani gimin Hindu skigiparang, tangka paisarangko nangtokpaengahachim ine janapatengon, skigiparangna jabrini dormaharangko on·chipkujaengani a·selan Hindu skigiparang, ia Pujako manina maming tarisamsoanirangko dakna man·tokpajaengaha ine AGHSSASTA-ni publicity secretary parakataha.
SSA-ni tangka paisarangko ma·mong sorkari watatmanahani gimin skigiparangni dormaharangko on·na gita State Education Mission Authority of Meghalaya (SEMAM), nanga gita lekkarangko tarisomanahachim ine janapatengon, ma·mong sorkarioniko tangka paisarangko jasana skangan a·dok sorkari man·soahaoba skigiparangni dormaharangko on·gija a·dok sorkari, ia tangka paisarangko ra·chipe dongenga ine AGHSSASTA matnangataha.