SHILLONG: NPP-chi dilenggipa MDA sorkarini kamrangni bidingo Trinamool Congress (TMC)-ni national spokesperson Saket Gokhale baksa jera ra·e rona skani dongja ine NPP-ni dilgipa aro a·dokni Deputy Chief Minister Prestone Tynsong parakataha.
Shillong Smart City project, gital Assembly building-ni protchong be·gruani aro uandakgipa sorkarini dingtang dingtang kamrangni bidingo Meghalaya a·dokni Deputy Chief Minister Prestone Tynsong-ko media-ni mikkango jera ra·grikna gita All India Trinamool Congress (AITC)-ni national spokesperson Saket S Gokhale ra·biatahachim ine nikna man·a.
Indake ong·engon, Gokhale-ni ra·bianiko Tynsong jegalatskaenba, unbaksa ua jera ra·e somoiko bon·atna skani dongja ine parakataha.
Sorkarini kamrangni bidingo ma·sie ra·na gita Gokhale, niamrangko ma·sijaenga ine janapatengon, “Da·o ua CM baksa jera ra·na gita ra·biskaenga ine anga songbadoniko nikaha,” ine Deputy Chief Minister parakataha.
Sorkarini kamrangni gimin ma·sie ra·na gita TMC-ni spokesperson-o bilrang gnang ine janapatengon, ua badiaba department-oniko ma·sie ra·na man·jaenga ong·ode RTI ka·e sing·sandina man·achim ine Tynsong parakataha.
“RTI-nade chinga aganchakaniko on·na bil donga indiba ua jera ra·nasa aganskaenga. Uni iandake jera ra·na ra·bianiko anga ra·chakna skani dongja,” ine Tynsong parakataha.
A·dokni nanganirangna ku·rangko on·timna gita maini gimin Meghalaya TMC-o spokesperson ba ku·wattimgipa dongja ineba ua sing·doangaha.
