SHILLONG: Assam aro Meghalaya a·dokni gisepo meligrikna man·jaenggipa bangki biaprangni bidingo agangrikaniko da·o Durga Puja chuttini ja·man a·bachengnaba gnang ine Budbar salo, a·dokni Deputy Chief Minister Prestone Tynsong parakataha.
Tynsong-ni parakatani gitade, Assam sorkari baksa apsan ia songrangko re·e nina tarikko tik ka·na skangba Meghalaya sorkari, a·doktangni regional committee-rangni tom·aniko ong·atna, nanga gita am·sandianirangko dakna aro dingtang dingtang dolrang baksa agangrikchengna nangnikenga.
“A·dokni pilak dolgittam regional committee-rangan, a·jatangtango ga·akgipa biaprangni bidingo district council-rang, Syiem-rang aro Rangbah Shnong-rang baksa apsan chanchirimna gita tarikko tik ka·gen,” ine Deputy Chief Minister parakataha.
Skanggipa bako bang·bata songni manderang aro dolrang baksa agangrikchengjahachim ine matnanganirangko jegalatengon, “Iandake matnanganiranga kakket ong·ja maina Assam sorkari baksa apsan songrangchi re·na skang aro Assam-ni regional committee-rangko grongna skang bang·en tom·anirangko ong·atchengaha,” ine Tynsong parakataha.
Regional committee-o KHADC-ni Chief Executive Membor Titosstarwell Chyne-ko rimnapjahani gimin sing·on, “KHADC-ni ning·o dolgni regional committee-rang, chong·motan West Khasi Hills aro Ri Bhoi district regional committee-rang dongani gimin chinga Elaka-ni EM aro Deputy CEM-na biapko on·skaaha,” ine Deputy CM parakataha.
Simani badiaba badiaba biaprango dolgni dinggrikanirangko nikna man·enga ine kobor on·gipani bidingo janapatengon, ia jolrango skangonin iandakgipa obostarangko nikna man·enga indiba regional committee-rangko songa intalan ia jolrango iandakgipa a·selrang ong·jachina gita a·dok damgnini chief minister-rangan, district administration-rangna ge·etaniko on·manaha ine Tynsong parakataha.
Indake ong·engon, Ri Bhoi District regional committee-o Jirang-ni MLA Sosthenes Sohtun aro KHADC-ni MDC Victor Ranee-koba membor dake napataha ine Home (Political) department-oni u·iataha.
