SHILLONG: East Khasi Hills a·jani Ichamati aro Majai simarango nosto ong·gimin ‘fencing’ ba kapenggipa silitingrang gita Bangladesh a·songni manderang, niam gri Meghalaya a·dokona napsrukbaenga ine Khasi Students Union (KSU) parakataha.
Batanggimin somoirangoba iandake niam gri napsrukbagipa manderangko KSU-ni membor-rang rim·na man·aha ine janapatengon, 2018-19 bilsirango mikkarang jime waanganio nosto ka·ako man·gipa fencing-rangko da·onan sorkari taripilkujaenga ine KSU, suk ong·gijaniko parakataha.
KSU-ni president Lambokstar Marngar-ni parakatani gitade, Bangladesh a·songrangoni bang·a manderangan niam gri Meghalaya a·dokona napsrukbaengani gimin iani bidingo baditaba chang a·dok sorkarina u·iatahachim indiba iandake niam gri napsrukbaenggipa manderangko champengna gita sorkari rakgipa ja·kurangko de·kujaengachim.
Niam gri napsrukbagipa manderang, a·dokni dingtang dingtang biaprango songdong a·chatokengaha ine janapatengon, iandake niam gri napsrukanirangko champengna gita sorkari, rakgipa niamrangko ra·gate on·jaengani a·selan gipin a·songrangoni manderang a·dokona napsrukbana cholrangko ra·skaenga ine Marngar parakataha.
Meghalaya a·doko Inner Line Permit (ILP)-ko ra·gatchina dabianiko ma·mong sorkari chu·sokate on·na nangengaha ineba ua parakataha.
ILP gita rakgipa niamrangko ra·gatjaskalde a·dokona niam gri napsrukanirangko champengna man·jawa ine janapatengon, a·dokni sak 60 MLA-rangan Delhi-ona re·ange ILP-ko ra·gatchina ma·mong sorkariko didina nangenga aro iani bidingo changni chang ku·rangko on·taitaina nangenga ine KSU-ni president parakataha.