SHILLONG: Tangka paisarangko jakkalsretenga aro dingtang dingtang kamrangko ka·anio ong·gija dakenga ine Opposition Trinamool Congress (TMC)-ni matnanganirangko man·rongengani gimin, sakkirang donggenchimode FIR ka·china ba Lokayukta-o badi ka·china National People’s Party (NPP) ra·biatenba, maming sakkirang dongjagenchimode iandake matnange rojachina aganataha.
“Uamang nanga gita sakkirang donggenchimode uamang kacharirangona re·ange badi ka·na man·aia aro darangba uamangko champengna man·jawa. Indiba uamang sakki gride indinari a·boke rojachina,” ine Robibar salo, Rajya Sabha-ni MP aro NPP-ni state president Dr WR Kharlukhi parakataha.
Gital Assembly building-ni protchong be·grugipani bidingo NPP-chi dilenggipa MDA sorkariko contractor aro auditor-rang baksa jak donga ine TMC-ni matnangenggipani gimin sing·anina ua ia kattarangko aganaha.
“Ian election-na skang politics kal·anisan ong·aia aro mamingba ong·ja. Sawa na·simangko police-rangona re·ange FIR ka·aniko ba Lokayukta-ona re·ange badi ka·aniko champengenga?” ine Kharlukhi sing·doataha.
An·tangtang cholijaengahani giminsa TMC-ni dilgiparang, dongsiksaktokenga ine janapatengon, ia dilgiparangara manderangni seokgipa Congress dolko watgale TMC-o napanggiparangsa ong·aia ine NPP-ni state president parakataha.
Meghalaya a·doko TMC dol, porikka ra·e nia dongkuja aro iandakgipa obostarang TMC-na kragipa ong·ja ine janapatengon, TMC-ni dilgiparang, iandake maming sakki gri sorkariko matnange roana bate an·tangtangni dolna gisik on·batode namgen ine Kharlukhi parakataha.
“Mi bitchilrangko name satgenchimosa nambata mirangko rana man·gen ine aganani gnang, uni gimin TMC-ni dilgiparang, bitchilrangko satani giminsa nambate kamko ka·na nangenga aro gipinrang gita mi raani gimin chanchikuna nangja,” ine Kharlukhi aganaha.
