SHILLONG: Shillong songjinmani Them Iew Mawlong-o songdongenggipa Harijan manderangko Bishop Cotton Road-o donggipa Shillong Municipal Board (SMB)-ni quarter-rangona apjitangskana gita sorkari manchiengon, ia biapo niam gri songdongenggipa manderangna biap on·aniko Khasi Students Union (KSU) aro Federation of Khasi Jaintia & Garo People (FKJGP) dolrang raken jegalatskaaha.
Dolgni NGO-rangni parakatani gitade, Shillong Municipal Board aro sorkarini gipin department-rango kam ka·gipa manderangkosa dingtang biapona apjitna gita High Level Committee (HLC)-ko songahachim indiba da·o ia biapo niam gri songdongenggipa pilak manderangkon sorkari, SMB-ni quarter-rangona apjitna gita tik ka·skaengachim.
“Shillong Municipal Board aro sorkarini gipin department-rango kam ka·giparangko ia biapona apjitanikode chinga ra·chakna man·a indiba Them Iew Mawlong-o niam gri songdongenggipa pilak dam 342 nokdangrangko ia biapona apjitanikode chinga raken jegalenga,” ine KSU-ni president Lambokstar Marngar parakataha.
Them Iew Mawlong-o niam gri songdongenggipa nokdangrangna biapko on·engani gimin sorkariko sing·doatengon, a·doko nokgri jamgri ong·e dongenggipa bang·bea Tribal manderangba dongskaachim aro adita bilsirangna skang, MUDA-ni a·rikgalgipa New Shillong Township-ni Umsawli-o songdongenggipa nokdangrangnaba sorkari biaprangko on·jahachim ine Marngar parakataha.
“Uni gimin iandake gipin biaprangoni re·bae niam gri songdongenggipa manderangna biaprangko on·ani pal a·arang donggijagipa Tribal nokdangrangna biaprangko on·skachina chinga sorkariko didienga,” ine KSU-ni president aganaha.
SMB-ni quarter-rangona apjitatako man·enggipa nokdangrangara SMB aro sorkarini gipin department-rango kam ka·giparangsa ong·na nanga ine FKJGP-ni president Dundee C Khongsit-ba dabiangaha.
“Them Iew Mawlong-o niam gri songdongenggipa manderangko a·rikgalani ja·man uamangna biaprangko on·aniara sorkarini kam ong·ja,” ine Khongsit parakataha.
SMB-ni quarter-rangona apjitatako man·enggipa nokdangrangara SMB aro sorkarini gipin department-rango kam ka·gipa manderangni nokdangrang ong·jagenchimode uamang iako raken jegalanggen ineba FKJGP-ni president, mikrakataniko on·angaha.
Comments are closed.