TURA: Budbar salo, Assam a·doko donggipa Garo National Council (GNC) aro Garo Women Council (GWC), Kamrup a·jani Santipur songo donggipa GNC-ni office-o jinma tom·bimonganiko ong·atangenba, Assam a·doko songdongenggipa A·chikrangna Garo Development Council (GDC)-ni pal Garo Autonomous Council (GAC)-ko on·skachina Assam sorkario dabiangaha.
Ia tom·aniko GNC Kamrup district-ni president Enindra U Marak dilangengon, ia tom·aniko ong·atani bidingo tom·anio bak ra·giparangna talate on·angenba, Assam a·doko songdongenggipa A·chikrangna GDC-ko ong·ja indiba GAC-kosa nangenga ine parakataha.
Ia tom·bimonganiko ong·atanio Assam a·dokni Garo Youth Council (GYC), All Assam Garo Gaonbura Association, Garo Mothers Union, Garo Students Union (Kamrup), A·chik Border Association, Garo National Union (Assam) aro jolo songdongenggipa manderangba dongpae bakko ra·angtokaha.
Assam-o donggipa mitam A·chik songrangko Meghalaya a·doko napatengani giminba ia tom·anio A·chik NGO-rang, Assam aro Meghalaya sorkarirangni kosako raken jegalanirangko dakangtokaha.
“Assam-o donggipa dam 21 A·chik songrangna baten Meghalaya a·doko napatenga indiba ia songrango donggipa A·chikrang, Meghalaya a·doko napataniko nangniktokjaengachim. Ia songni manderangko dolgnichipaknin Meghalaya sorkarini on·enggipa scheme-rangchi Meghalaya a·dokona salangna jotton ka·enga,” ine ia tom·anio GNC Kamrup district-ni president Enindra Marak parakataha.
Iandake songni manderangko tol·gipa kattarangchi Meghalaya a·doko napatna jotton ka·enggipa manderangko rim·china Assam sorkario dabiangengon, Assam a·doko aro mongsongbate Boko aro Chaaygaon constituency-rango songdongenggipa A·chik manderangko mitam political dolni dilgiparang, iandake bak dake bilgriatna jotton ka·enga ine Marak aganaha.
