Jharkhand-oniko Garo Hills gita B’desh-ona koela watna a·bachengataniko ADE jegala

TURA: Jharkhand a·dokni koelarangko Garo Hills gita Bangladesh a·songona watna a·bachengatengahaon, Garo Hills-ni ramarang gita metric ton 3300 koelarangko ra·anganiara ramarangko nosto ka·ani gita ong·gen ine Garo Hills-ni Association for Democracy & Empowerment (ADE) parakatenba, Garo Hills gita koela salaniko watna skang obostarangko name sandichengchina a·dok sorkariko didiataha.
“Ia kamko a·bachengatanichi namgnirangko man·na an·ching ka·dongsoengon, Garo Hills-ni ramarang gita Bangladesh a·songona koela watanichi mai dakgipa namgijanirangko ra·bagen, ukoba an·ching nisamsona nangenga. Skanggipa sing·anide, Jharkhand-oniko Garo Hills gita Bangladesh a·songona koela salenganichi sawa namgnirangko man·gen? Ia kamchi an·chingni a·dokba namgnirangko man·genma? Ma ia kamko ka·na on·anichi ia kamko ka·enggipa mande saksakosan man·e cha·dapatna siengama? Chinga ADE-ni gita darangni kosakoba mikbu-miknenganirang dongja indiba chinga a·dokni rama jal·langrangni gimin chanchiengani giminsa iako janapatenga,” ine ADE-ni president Dalseng Bira Ch Momin parakataha.
Garo Hills-o indinan rama jal·langrang namjaengaha ine janapatengon, skanggipa changon metric ton 3300 koelarangko salbaaha aro mikkangchiba bang·en koelarangko ia rama gita salangkugen indide indita koelarangko ia salrurana Garo Hills-ni ramarang baigenma ine Momin sing·doataha.
“Uni gimin ia kamni bidingo chingna name talate on·jaskalde chinga Garo Hills-ni rama jal·langrangko nosto ka·na on·na man·jawa. Ia ramarang gita koela salruraanichi manderangni neng·nikanirangko maikai PWD, National Highway-ni official-rang aro gipin nangchakegipa department-rang chel·chakna miksongenga?” ineba ADE-ni president sing·doataha.
Garo Hills gita Bangladesh a·songona koela salanichi Meghalaya a·dokna man·dapanirang donggenchimode maming jegalani dongjawa indiba maming man·dapanirang donggija rama jal·langrangkosa nosto ka·dapani ong·genchimode ia kamko raken jegalangkugen ineba Momin parakataha.