SHILLONG: Meghalaya a·doko joa kal·aniko niamo ong·atna sorkarini manchianiko dingtang dingtang dolrang jegaltokengon, Meghalaya Regulation of Gaming Act 2021-ko a·dok sorkari den·galpilchina gita Sukrobar salo, Khasi Jaintia Christian Leaders Forum (KJCLF)-ni membor-rang, jinma Nokgipao Isolo bi·e tom·aniko ong·atangskaaha.
Ia tom·aniko KJCLF-ni dilgiparang, Shillong songjinmani KJP Assembly Chapel-o ong·atangaha aro ia tom·a matchotani ja·mano KJCLF-ni secretary Rev Edwin H Kharkongor, kobor ra·timgipa manderang baksa agangrikengon, Meghalaya Regulation of Gaming Act 2021-ko den·galpilchina didianio uamang sorkarini kosako jingjengatanirangko dakna nangnikjae, sorkarina Nokgipa Isolo bi·chakangskaaha ine parakataha.
“Chinga Kristianrang ong·e sorkarini kosako jingjengatanirangko ba jegalanirangko dakna nangnikjaenga indiba ia niamko den·galpilna man·na gita chinga a·dok sorkarina Nokgipa Isolo bi·chakna manchiskaaha,” ine ua aganaha.
Rev Kharkongor-ni parakatani gitade, a·doko Casino-rangko kulina tik ka·aniko sorkari dontongatpilaha ine aganengoba, kamrangko chu·gimik dontongsranga gitasa nikkujaengachim.
“Chinga Nokgipa Isolo bi·an baksana a·doko joa kal·anirangko niamo ong·atjachina aro ia Meghalaya Regulation of Gaming Act 2021-ko chu·gimik den·galchina sorkario mol·molenga,” ine KJCLF-ni secretary parakataha.
Rev Kharkongor-ni parakatani gitade, a·doko joa kal·aniko niamo ong·atjachina ia forum aro dingtang dingtang dolrangni dabiangani ja·mano a·dokni Chief Minister an·tangan, mondolirangni aro dingtang dingtang dolrangko man·chape a·doko songdongenggipa manderangni nangnikaniko knachakgen ine ku·rachakaniko on·ani ja·manoba a·dok sorkari, Meghalaya Regulation of Gaming Act 2021-ko ra·galpilani bidingo maming ku·rachakaniko on·a dongkujaengachim.
Gaming Act-ko den·galchina KJCLF-ni membor-rang tom·e bi·rimaniko ong·ata
Date:
Share post:
