SHILLONG: Bristibar salo, kamtangtango rakkipilchina dabie jingjengatenggipa skigiparangni kosako police-rangni nangana bate bilko jakkalahani gimin aro tear gas-ko godapahani gimin Meghalaya Democratic Alliance (MDA)-o bakrimenggipa United Democratic Party (UDP)-ko man·chape dingtang dingtang dolrang, a·dokni Home Minister Lahkmen Rymbui-ko kam watchina dabiangtokaha.
Jingjengatenggipa skigiparangni kosako iandake bilko mesokahani gimin an·tangtangni suk ong·gijaniko parakatengon, skigiparang baksa uamangni jik-dedrangrangba dongachim indiba iandake police-rangni bilko mesokaniara namen kragijani ong·aha ine UDP-ni dilgiparang parakatenba, Rymbui-ko Home Minister ong·aoniko ra·galchina UDP-ni president aro Assembly-ni Speaker Metbah Lyngdoh-ko didiattokaha.
Skigiparangni kosako tear gas godapaniko namen kragijagipa kam ong·aha ine janapatengon, jingjengatenggipa skigiparangni kosako bilrangko jakkalna nangani katta dongjachim ine UDP-ni dilgiparang parakataha.
Rymbui-ko Cabinet-oniko ra·galchina dabienggipani gimin sing·on, UDP-ni bang·bata dilgiparangan ia a·selni bidingo suk ong·tokjaenga aro Rymbui-ko Cabinet-oniko ra·galchina UDP-ni president-ko diditokaha ine UDP-ni dilgiparang parakataha.
Home portfolio baksana Lahkmen Rymbui, Education, Border Area Development aro District Council Affairs department-rangkoba jako ra·engachim ine nikna man·a.
Skigiparangni kosako iandake police-rangni bil jakkalahani gimin Voice of the People Party (VPP) dolba raken jegalataha aro a·dokni Home Minister Lahkmen Rymbui-ko kamtangoni ong·katchina dabiangaha.
Jingjengatenggipa skigiparangko Secretariat-o napna on·jahani gimin aro skigiparangko grongna jechakahani giminba VPP-ni dilgiparang, a·dokni Chief Minister aro Deputy Chief Minister-koba matnangataha.
Apsan daken, a·dokni Opposition Trinamool Congress (TMC)-ba, skigiparangni kosako kragija dake tear gas-rangko godapahani gimin suk ong·gijaniko parakataha aro skigiparangni kosako nangana bate bilko jakkalahani gimin sorkariko matnangataha.
