SHILLONG: Bristibar salo jingjengatenggipa skigiparangni Secretariat-ona napdraangengmiting somoio police-rangni skatang tear gas godapani gimin jegale dingtang dingtang dolrang, a·dokni Home Minister Lahkmen Rymbui-ko kam watchina dabitokengon, ua an·tangni kamko watna jechakatskaaha.
“Anga kamtangko watjawa maina ia a·sel ong·aniara angni kamni a·sel ong·jaha. Ia kamo anga maming jak dongjagenchimode maini gimin anga kamtangko watgen?” ine Rymbui sing·dopangpilataha.
Kamtangtango rakkipilchina dabie jingjengatenggipa skigiparangni kosako police-rangni nangana bate bilko jakkalahani gimin aro tear gas-ko godapahani gimin Meghalaya Democratic Alliance (MDA)-o bakrimenggipa United Democratic Party (UDP)-ko man·chape dingtang dingtang dolrang, a·dokni Home Minister Lahkmen Rymbui-ko kam watchina dabiangtokahachim.
Jingjengatenggipa skigiparangni kosako iandake bilko mesokahani gimin an·tangtangni suk ong·gijaniko parakatengon, skigiparang baksa uamangni jik-dedrangrangba dongachim indiba iandake police-rangni bilko mesokaniara namen kragijani ong·aha ine UDP-ni dilgiparang parakatenba, Rymbui-ko Home Minister ong·aoniko ra·galchina UDP-ni president aro Assembly-ni Speaker Metbah Lyngdoh-ko didiattokahachim.
An·tangko ra·galchina dabienggipa manderangna aganchakaniko on·angskaengon, “Manderangni dabienggipani gimin anga an·tangde mamingkoba ma·sija indiba angade kamtangko watna man·jawa,” ine Home Minister parakataha.
Uko uni dol aro sorkari, bolina on·gimin mes bi·sa gita jakkalengama ine sing·on, “Anga bolina on·kanggimin mes bi·sa ong·ja aro chinga a·dokni nanganirangko chu·sokatna gitasa pilakan sorkari nangrime kamko ka·enga,” ine Rymbui parakataha.
