SHILLONG: Meghalaya a·dokko ‘gunda’ dakgipa politics dolni manderangsa chalaienga ine Robibar salo, Meghalaya a·dokni Congress dol parakatenba, a·doko drugs, koela, chu aro a·arangko niam gri chalaiani tangka paisarangko United Democratic Party (UDP) man·engani giminsa an·tangtangko chu·sokgipa ong·enga ine a·kangenga ine matnangataha.
“A·doko politics gundarang donga aro pilakkon uamangsa chalaienga. A·doko niam gri sam badingani, chu, koela, a·a ia pilakon bang·bea tangka paisarang donga aro ia tangka paisarangara UDP-on ong·ani giminsa uamang chu·sokgipa ong·enga ine a·kangenga,” ine Robibar salo, Shillong-ni Lok Sabha MP aro Meghalaya Pradesh Congress Committee (MPCC)-ni president Vincent H Pala parakataha.
Da·ororoni somoiode tangka paisa donggenchimode a·doko bilakgipa ong·na man·aia ine janapatengon, batanggimin bilsibri atana niam gri drugs badinganirang donggenchimoba da·osa sorkari, sam badinggiparangko rim·na a·bachengenga ine Pala parakataha.
“Meghalaya a·doko ramarangko, bading chiwalanirangko, koelarang, pekatgipa samrangko aro uandakgipa pilak kamrangkon politics gundarangsa chalaienga. UDP-o dingtang dingtang portfolio-rangko jako ra·gipa manderang bang·genchimoba Jemino Mawthoh gita namgipa politician-rangba donga indiba uaba a·doko ong·enga chong·mot obostarangko tale ma·sija,’ ine ua aganaha.
Adita salrangna skang, contractual skigiparangni jingjengatanio ong·anggipa a·selni gimin janapatengon, skigiparang ramarango jingjengate maming namgnirangko man·jahani giminsa chubata gadango agangrikna re·angahachim ine MPCC-ni president parakataha.
“Maiba kam niam gri ong·genchimoba chugipa gadangode uko niamo ong·atna man·ani giminsa skigiparang, ramao jingjengatani pal, an·tangtangni dabianirangko chu·sokatchina chubata gadango agangrikna re·angahachim,” ine Pala aganaha.
Batanggimin somoirangoba jingjengatenggipa skigiparang, a·dokni Education Minister Lahkmen Rymbui-ona re·angode pangnan chu·sokaniko man·rongjachim indiba skigiparang, chief minister aro deputy chief minister-ona re·angode namgipa aganchakanirangko man·rongachim ineba Pala parakataha.
