SHILLONG: Re·anggipa Sonibar salo Union Home Minister Amit Shah, ‘Drug Trafficking & National Security’-ni bidingo salgro salaram a·dokrangni chief minister-rang, chief secretary-rang aro director general of police (DGP)-rang baksa Guwahati songjinmao tom·e chanchirimaniko ong·atangaha aro ia tom·anio Meghalaya a·dokni pal, a·dokni Home Minister Lahkmen Rymbui aro Chief Secretary DP Wahlang dongpae bak ra·angskaaha.
Salgro salaram a·dokrango drugs ba pekatgipa samrangko bon·atna kam ka·ani bak gita salgro salaram a·dokrango rim·gipa kg 40,000 samrangko ia salo, dingtangmancha Union Home Minister-na internet gita so·e mesokataha.
Ia tom·anio Union Home Minister Amit Shah, salgro salaram a·dokrangni dilgiparang baksa chanchirimangengon, a·dok ge·antion Forensic Science Laboratory dongna gita nanga aro iana ma·mong sorkari, 50 percent-ni gita tangka paisarangko dakchake on·na man·gen ine parakangaha.
Narcotics Council of Bureau (NCB)-ni regional office-ko Guwahati songjinmao kuliaha aro regional office-rangkoba Tripura a·dokni Agartala aro Arunachal Pradesh a·dokni Pasighat/Lower Siang-o kulie New Jalpaiguri-o zonal office-ko kulina kamrangko a·bachengataha ineba ia tom·anio parakataha.
Salgro salaramni pilak chief minister-rangkon, Narco Coordination Centre (NCORD)-ni tom·anirangko ong·atchina aro iako district level-ona ra·angchina gitaba Union Home Minister ia tom·anio didiangaha.
Salgro salaram a·dokrango ganja ge·anirangko nirikkina aro champengna gita drone-rangko, artificial intelligence-ko aro satellite mapping-ko jakkalchina gitaba Shah didiangaha.
