TURA: Simsanggre Village Court-na membor-rangko seokanio dam 36 a·kingni nokmarangko watchanggale aro maming agangrikchengani grisa seokaha ine ia dam 36 a·kingni Nokmarang, Garo Hills Autonomous District Council (GHADC)-ni chief executive membor (CEM)-na badi ka·e sedoatani ja·man, ia village court-ni membor-rangko seokanio niamko ja·rikjahani gimin A·chik Organisation for Social Welfare (AOSW) dolba GHADC-ko matnangataha.
Nokmarangni CEM-na badi ka·doangani gitade, Simsanggre Village Court-na seokako man·gipa membor-rangara pilakan Rongbing Boldak a·kingonisa ong·tokaiachim aro ia membor-rangko seokanio dam 36 a·king nokmarang baksade maming agangrikchenga dongjahachim.
“Simsanggre Village Court-ni membor-rangko seokanio village court-ni president aro secretary-sa politics kal·e dam 36 A·king Nokmarangni gisepo meligrikgijaniko ra·bana jotton ka·aha. Village Court-ni membor-rangko seokanio maini gimin dam 36 a·king nokmarang baksa agangrikchengjaha ine sing·on, ‘GHADC-ko chalaienggipa executive committee, an·tangni ska gita dakna bil dongaia’ ine aganchakaha. Uni gimin iandake village court-na membor seokaniko chinga raken jegalenga,” ine AOSW-ni president Gripping Marak parakataha.
Marak-ni parakatani gitade, ia Nokmarang RTI ka·e am·sandianirangko dakon, ia village court-ni da·o secretary ong·enggipa, gitcham jury membor-rangni Dakorarangni aro court membor-rangni man·gnirang, chong·motan 2011 bilsioni 2016 bilsiona man·gnirangkoba okaha ine ma·sina man·ahachim.
“GHADC-ara NPP-ni ba EC-ko chalaienggipa dolrangni nok ong·ja aro uamang an·tangtangni skani gita maming kamkoba ka·na bil dongja. Apsan daken Simsang Village Court-ba sason ka·enggipa dolrangni court ong·ja aro uamang iako an·tangtangni man·gnirangna jakkalsretna bil dongja,” ine AOSW-ni president parakataha.
Village court-ni membor-rang, bilsi 35 aro bilsi 60-ni gisepo ong·na nanggen ine 2016 bilsio GHADC-ni on·gimin niamni gimin janapatengon, ia u·iataniko GHADC, Garo Hills gimikni village court-rangnade sokatjaha aro iako uamang East aro North Garo Hills a·jani laskar-rangoniko kobor man·soaha ine AOSW-ni president parakataha.
