SHILLONG: East Khasi Hills a·jao Umiam-oni Mawiong-ona dakanggipa ramako sorkari taripile on·kujaengani a·sel ramani obostarang namroroangjaengaha aro ia ramako re·ruraenggipa manderang neng·nikanirangko chagrongna nangtokengaha ine u·iataha.
Ia ramara, Meghalaya a·dokni skotong Shillong songjinmaona dakanggipa ramarangoni mongsongbatgipa rama dilsaba ong·engachim ine nikna man·a.
Kobor on·timgiparangni u·iatani gitade, Umiam-ona kingkingan Mawiong-oni dakbagipa ramani obosta namroroangjaengahachim aro ia ramara a·doko apchangketbatsranggipa ramarangoni dilsa ong·genchimoba ia ramako tarina gita sorkari gisiko nangjaengachim.
Ia ramako sorkari tarie on·jaengani a·selan ia rama gita salruraenggipa taxi garirangba ta·raken nosto ong·tokenga ine taxi salruragipa manderangba parakataha.
“Ia ramako tarichipgija donaigenchimode garirang bilsigniba baijawa. Ia ramako chu·gimik tarie on·jagenchimoba ramao a·kolrara dakgiparangkode tarie on·pana nangachim,” ine Shillong-o taxi sale cha·enggipa mande saksa aganaha.
Ia rama gita chakka samgni donggipa garirangba bang·en re·ruratokenga indiba ia ramako tarichipjagenchimode basakobarangde dal·e a·sel ong·anirangko niknaba gnang ine mitam manderang parakatskaaha.
Ia ramako tarina gita bakan National Highways & Infrastructure Development Corporation (NHIDCL) tender-na okamgnok aro ia ramani mitam bakrangsan nosto ong·aha ine adita salrangna skangsan, a·dokni Deputy Chief Minister aro PWD (Roads) Minister Prestone Tynsong parakatahachim ine nikna man·a.
Ia ramako tarina gita Detailed Project Report (DPR)-ko NHIDCL tariengaha aro ia ramako black topping on·e tarina gita bakan tender-na okamgnok ineba ua parakatahachim.
