SHILLONG: National People’s Party (NPP)-ni kosako matnanganirangara kakket ong·a dongjani gimin aro opposition dolni ‘balloon’ bangbangon bretna siengani gimin re·baenggipa 2023 bilsini Assembly election-o NPP-na maming nangchakeani dongjawa ine NPP-ni state president aro a·dokni Rajya Sabha MP WR Kharlukhi parakataha.
“NPP-ni kosako matnanganirangara maming kakket ong·ani dongjani gimin chingna maming nangchakeani dongjawa. Uamangni matnanganiranga kakket ong·genchimode, kakketko mesokchina ba kachariona ba police-rangona re·angchina. Ian politics-ni gita balloon watanisan ong·aienga aro ia balloon bangbangon bretgen,” ine Kharlukhi aganaha.
Sakkirang donggenchimode ja·kurangko de·chakatchina opposition dolko ra·biatengon, “Na·simangni silchidareko nisan ka·mangmange dongainabe, gulirang donga ong·ode gobo,” ine NPP-ni state president parakataha.
NPP-ni kosako matnanganiranga pangchakani gri matnanganisan ong·aia ine janapatengon, “Na·simang cha·ugipako nikode FIR ka·gen ba police-rangko okamatgen indiba nang·o maming sakkirang dongjaode na·a mamingkoba dakjawa. Uamang kakketko aganbebeenga ong·ode da·o maikobade dakenggnokchim,” ine Kharlukhi aganaha.
NPP-chi dilenggipa MDA sorkarini kosako tangka paisa jakkalsretanina aro dingtang dingtang kamrangko ka·sretanina matnangtokengoba da·onan maming sakkirangko mesoka dongkujachim aro matnangenggipa dolrangba da·onan maming ja·kurangko de·tokkujaengachim ine nikna man·a.
Re·baenggipa 2023 bilsini Assembly election-ni bidingo janapatskaengon, “Chinga rakbee kamrangko ka·soengani gimin ian NPP-na bite nanggipa election ong·gen aro pilak dilgiparangan a·dokni kona noksikrangona re·e kamrangko ka·engahani gimin chinga namgipa miko rana ka·dongenga,” ine NPP-ni state president parakataha.
Election-na skang NPP, gipin dolrang baksa bakrimjawa ine janapatengon, election-ni result-rangko niesa NPP dol, gipin dolrang baksa bakrimna nangama nangjawa ukoba nigen ine Kharlukhi parakataha.
