SHILLONG: Re·baenggipa 2023 bilsini Assembly election-na campaign ka·samsoani bak gita Meghalaya a·doko donggipa BJP-ni dol 55 mandal committee-rang baksa tom·aniko ong·atangaha ine Mongolbar salo, BJP-ni state president Ernest Mawrie parakataha.
Mawrie-ni u·iatani gitade, re·baenggipa election-o candidate-rangni cheani cholrangko nina gita booth level committee-rangko songna ia tom·anirangko ong·atangaha aro ia tom·anirangko Mawkynrew, Pynursla, Rambrai, Ampati, Salmanpara, Songsak, Chokpot, Jirang, Nongpoh aro uandakgipa mandal-rang, jeon batanggimin somoirango BJP-ni gita maming biming dongkujachim, uandakgipa biaprango ong·atangaha.
Da·o dipet Nongthymmai aro East Shillong Constituency-rango BJP-ni candidate-rang dongkujaengoba, ia constituency-rango bang·a manderangan da·o BJP-na kamko ka·tokengaha ineba Mawrie parakataha.
Garo Hills-o gital membor-rang BJP-o naprorobaengani gimin Garo Hills-ni dingtang dingtang biaprango BJP-ko bilakbatatna gitaba tik ka·aha ineba BJP-ni state president parakataha.
BJP-ni national president JP Nadda, Shillong-ona re·banaba gnang ine janapatengon, ua re·babebegenchimode dingtang dingtang mandal-ni manderangna Shillong-o aganprakanggen ine Mawrie parakataha.
Meghalaya a·dok gimikon booth level committee-rangko October jani bon·angachibara songna gita somoiko tik ka·manaha ineba ua parakataha.
