PMBSY-ni namgnirangko on·na gita EGH-o tom·e chanchirima

WILLIAMNAGAR: e-SHRAM portal-o biming segataniko bariatna aro mongsongbate Pradhan Mantri Suraksha Yojana (PMBSY)-ni ning·o biming segatgimin manderangna ia scheme-ni namgnirangko on·na man·na gita re·anggipa Sombar salo, East Garo Hills a·jani Deputy Commissioner Jagdish Chelani, District Level Committee-ni tom·aniko, uni office chamber-o ong·atangaha.
Ia tom·anio East Garo Hills a·jani Deputy Commissioner, committee-ni membor-rang aro dingtang dingtang officer-rang baksa chanchirimangengon, hajira ka·e cha·enggipa manderangna PMBSY scheme-ni namgnirangko on·na man·na gita e-SHRAM portal-o biming segatani gamchatani bidingo manderangna agan-talate on·china aro dingtang dingtang department-rang baksana dingtang dingtang dolrang baksa tom·anirangko ong·atchina East Garo Hills a·jani Deputy Labour Commissioner-ko didiangaha.
East Garo Hills a·jao hajira kam ka·e cha·enggipa manderangko biming segatanio pilak nanga dakchakanirangko on·na gitaba ua ku·rachakangaha.
Ia tom·anio Deputy Labour Commissioner MN Marak-ba aganprakengon, PMBSY scheme-ni namgnirangko man·na gita unorganised worker-rang, e-SHRAM-ni www.eshram.gov.in portal-ona re·ange, an·tangtangko register ka·na man·gen ba sepangbatgipa Common Service Centre-rangonaba re·ange register ka·na man·gen ine talataniko on·angaha. Da·o dipet East Garo Hills a·jao sak 20378 kam ka·giparang, e-SHRAM portal-o biming segataha ineba Marak parakataha.