TURA: National People’s Party (NPP)-chi dilenggipa Meghalaya Democratic Alliance (MDA) sorkarini ning·o pilakan chaktopilgijagipa neng·nikanirangko man·tokna nangenga ine Budbar salo, All India Trinamool Congress (AITC)-ni chadamberangko dilgipa Richard Marak matnangataha.
Marak-ni parakatani gitade, MDA sorkarini somoio skigiparangsan ong·aigija dingtang dingtang kamrangko ka·e cha·enggiparang aro a·doko songdongenggipa manderangba sorkarini kamna suk ong·jae salantian jingjengatanirangko dakna nangengachim.
Meghalaya a·dokni chief minister aro deputy chief minister, pangnan kobor ra·timgiparangna agan-talatanirangko on·rongenga ine adita salrangna skang, sakgipin Cabinet Minister James K Sangma-ni agangipa kattarangni gimin sing·doatengon, agan-talataniko on·mangmanganiara a·dokni manderangna chu·ongaigenma ine Marak sing·doataha.
Re·baenggipa 2023 bilsini Assembly election-o Richard Marak-ba, South Tura constituency-o a·dokni Chief Minister Conrad Sangma baksa AITC doloni susanaba gnang ine niksamsona man·engachim.
“A·doko mande sakantian chaktopilgija neng·nikanirangko chakna nangtokenga. Skigiparang salantian ramarango jingjengatenga, MeECL-ni sak 1802 contractual employee-rang an·tangtangni man·na nanganirangna sorkarini kosako jingjengatenga. Meghalaya a·doko Saubhagya Scheme-ni kamrangko ka·anio gong kror 149-na baten tangka paisarangko jakkalsretaha aro smart meter scheme-oba gong kror 232 tangkarangko jakkalsretaha,” ine AITC-ni chadambe dolko dilgipa Marak parakataha.
Marak-ni parakatani gitade, manderangni jakchi seokako man·giparang ong·e dilgiparangni kamara Secretariat-o asonge dongaigija manderangni nanganirangko chu·sokatanisa ong·engachim.
MDA-ni ka·sretgipa kamrangko jinmana parake bon·atjaskalde AITC neng·takjawa ineba Marak parakataha.