Rongara sub-way-ko chi man·angani a·sel garirang re·angna gita man·jaenga

TURA: Garo Hills-oba dontonggija mikkarang waangani ja·man South Garo Hills a·jani Rongara-ona re·ruraenggipa manderangna tarie on·chenggipa sub-way-koba Mongolbar salo chi man·angaha aro uandaken Rongara-ona re·ruraenggipa gari gorarang re·na man·jae bang·a manderangan neng·nikanirangko chagrongna nangtokengaha ine kobor on·aha.
Koborko on·ani gitade, adita jarangna skang mikkarang dontonggija waanganio Rongara-ona dakanggipa dolong aro ramarangko chi pe·angani ja·man, manderang re·rurana man·na gita sub-way-rangko tarichengahachim indiba batanggimin salrangonin Garo Hills gimikon dontonggija mikkarang waangahani a·sel chirang dal·bae, ia sub-way-rangkoba chi man·angtaiaha.
Re·anggipa July jao Garo Hills-ni bang·bata biaprangon mikkarang dontonggija waangani a·sel Rongara-ona dakanggipa bolni dolong aro ramarangko chi pe·angahachim ine nikna man·a. Ua somoirangoba manderang rama dongjae bang·a neng·nikanirangko chagrongna nangahachim aro da·oba gari gorarang re·rurana man·na gita tarie on·gipa sub-way ba chonchongipa ramarangko chi pe·angtaiahani a·sel manderang neng·nikanirangko chagrongna nangtaiengaha ine kobor on·timgiparang parakataha.
Mikkarang waangani a·sel ia sub-way-rangko Mongolbar salo chi man·angahaoba salsa salgnini gisepon mikkarang namangahaode taripile on·na man·naba gnang ineba kobor on·aha.
“Rongara-ona re·ruraenggipa garirangna tarie on·chenggipa jal·langrang da·o mikkani a·sel pe·ako man·taiaha indiba gari gorarang re·rurana man·na gita chinga kamrangko ka·enga. Mikkarang namangahaon chinga man·a dipet rama jal·langrangko taripile on·gen aro songni manderangba ching baksa bakrimaniko on·enga. Gari gorarang re·na man·jaengoba manderang chirangko bate re·tokenga,” ine South Garo Hills a·jani Superintendent of Police (SP) Siddharth Ambedkar parakataha.