RESUBELPARA: Budbar salo, North Garo Hills a·jani Raja A·pal songo International Day for Older Persons ba butchuma budeparangni salko maniani bak gita dingtang dingtang program-rangko ong·atangaha.
Ia program-ko North Garo Hills a·jani District Social Welfare Office baksana District Legal Services Authority (DLSA) nangrime ong·atangaha aro ia program-ko ong·atanio bilsi 60 batgimin butchuma budeparang bakko ra·angenba, ia program-o indin on·anggipa medical check up-ko ka·e ra·na cholrangko man·an baksana old age scheme, legal rights, pension scheme aro uandakgipa scheme-rangni bidingo agan-talate on·anirangko knae ra·angna man·aha.
Ia butchuma budeparangni salko manianio Resubelpara CHC-ni Medical & Health Officer Dr CM Sangma, jinmana aganprakangengon, butchuma budeparangna simsak nirokanirangko on·na nangani gimin aro uamangna on·gimin bilrangni gimin agan-talate on·angaha.
An·seng baljoke dongna man·na gita salantian be·enna namgipa cha·anirangko cha·china aro be·enni gita ranta ka·anirangko dakjringchina gitaba ua butchuma budeparangko didiangaha.
Ia program-ko ong·atanio DLSA-ni Advocate Bianca K Marak-ba dongpae jinmana aganprakengon, ainni gita indin on·enggipa dakchakani aro senior citizen act ba butchuma budeparangna ra·gatgimin niamrangni bidingo agan-talate on·angskaaha.
