TURA: Tura-ni Don Bosco College-o World Investor Week-ko maniani bak gita mijal Bristibar salo, ‘Investment: Pros and Cons’-ni bidingo dingtangmancha Commerce stream-o poraienggipa chatro chatrirangna agan-talate on·anirangko dakangaha.
Ia program-ko ong·atanio, National Securities Depository Limited (NSDL)-ni songe on·ako man·gipa North Eastern Hill University (NEHU) Tura campus-ni Management Department-ni Head, Prof KC Biswal, chatro chatrirangna agan-talate on·anirangko dakangaha.
Tom·ani a·bachengao, Tura Don Bosco College-ni Principal Fr Bivan Rodriques Mukhim, program-o bak ra·giparangna rimchaksoani kattarangko aganangenba, ia program-ko ong·atani bidingo talate on·angjolaha.
Ia program-ko ‘Azadi ka Amrit Mahotsav’-ni bak gitaba ong·atangaha.
