SHILLONG: Mongma wagam aro uandakgipa dingtang dingtang matburingrangni gamchatgipa bosturangko Myanmar aro Indo-China jolrangoniko badingsrukna gita Meghalaya a·dokko rama gita jakkalenga ine kobor on·aha.
Shillong-o donggipa (FU) Division-ni Divisional Forest Officer Anu P James-ni Bristibar salo parakatani gitade, batanggimin bilsi 20-ni gisepo, ma·manti bosturangko badingsrukna gita Meghalaya a·dokko man·chape salgro salaramni dingtang dingtang a·dokrangko rama gita dake jakkalenga ine see rakkianio parakaha.
Salgro salaram a·dokrango matburingrangko so·ote galani aro badingsrukanirangko nikna man·genchimoba awareness program-rangko ong·atjringanichi da·o iandake matburing badingsrukanirangko bewalan komiatna man·aha aro manderangba matburing so·otaniara dos dakani ong·a ine ma·sitokengaha ineba ua parakataha.
Meghalaya a·doko mongma aro manderangni gisepo a·sel ong·anirangni gimin janapatengon, mongmarang pangnan re·ronggimin ramakosan re·aiani gimin Forest department, iandakgipa biaprangko sandie bak dakataha aro iandakgipa neng·nikaniko namatna gita uamang dingtang dingtang songni manderang baksaba agangrikenga ine James parakataha.
Je biaprang gitan mongmarang re·batrongachim, uandakgipa songrango department, committee-rangko songe, mongmarangko katatna gita chonchongipa bomarangko suale on·aha ineba ua parakataha.
