SHILLONG: Simsang chibima ning·oniko niam gri koela bikotaniko champengna gita dingtangmancha sorkarini songe dongimin expert committee tik ka·angaha.
“Chibimaonikon manderang ringna aro dingtang dingtang kamrangna jakkalengani gimin chibima ning·oniko koela bikotaniara namen kenchakna nangani ong·enga. Iandake niam gri kam ka·aniko chinga ta·raken champengna ja·kurangko de·anggen,” ine Bristibar salo, Principal Chief Conservator of Forest (PCCF) BK Lyngwa parakataha.
Koborko on·ani gitade, Simsang chibima ning·o donggipa koelarangko, badiaba badiaba jolni manderang, mongsongbate ding·karini somoirango niam gri bikotengachim.
“Dingtang dingtang a·jarango donggipa chibimarango iandake niam gri dakanirangko chinga kobor man·soaha aro ia chibimarangoni Simsang chibimaba damsa ong·engani gimin chinga ia chibimao niam gri koela bikotaniko champengna ta·raken ja·ku de·gen,” ine Lyngwa aganaha.
Da·o dipet ian uamangni gnigipa changna tom·anisan ong·kuenga ine janapatengon, uamang deputy commissioner-rangoniko data-rangko chimonge mitam a·jarangonikoba talbate ra·anggen ine PCCF parakataha.
Simsang chibimara Garo Hills-ni dal·batsranggipa aro mongsongbatgipa chibima ong·a aro ian Bangladesh a·songona jokonanggipa chibima ong·a ine nikna man·a.
Bilsiantian wachini somoirango a·dokni dingtang dingtang koela a·damrangoniko koelarangko man·ange Simsang chibimao dapa gita dakskaengani gimin bang·a manderangan ding·karini somoirango ia koelarangko bikotna jotton ka·skaengachim ine nikna man·a.
