TURA: Assam aro Meghalaya a·dokni simarango meligrikna man·jaenggipa biaprangoni damdok biaprangko skanggipa bako namatna kam ka·anio sorkarina on·gipa regional committee-rangni report-ko jinmana parakjahani a·sel manderangni gisepo da·oba jajaani aro sorkario ka·dongna man·gijaniko ong·atenga ine Garo Hills-ni dolbri NGO-rang, chong·motan FKJGP, AYWO, ADE aro FAF dolrang parakatenba, a·dok damgnini simarango ong·enggipa golmalrangko namatna kam ka·anio manderangna maming ma·sisretna nanganirang dongjana gita aro kamko ka·anio maming dongnuani gri ong·na man·na gita regional committee-rangni report-ko jinmana parakchina dabiangaha.
Dolbri NGO-rangni parakatani gitade, Assam aro Meghalaya sorkarirangni memorandum of understanding (MoU)-o soi ka·grikanichi Meghalaya a·dok ning·o ga·akgipa mitam A·chik songrangko Assam-o man·angengani gimin jegalna gita re·anggipa August jani 22 tariko, ia dolrang Shillong Civil Hospital-ni sambao U Kiang Nangbah-ni statue-ko tarie dongipa biapo jinma asonge jingjengataniko ong·atangaha aro ia jingjengatanio Khasi Students Union aro Khasi Hills-ni FKJGP dolrangba bakko ra·angahachim.
Jinma asonge jingjengatani ja·man salgipin, ia dolni dilgiparang a·dokni Chief Minister aro Deputy Chief Minister-koba grongna cholko man·aha, jeon uamang an·tangtangni jegalaniko, seachi aro ku·sikchiba u·iatahachim.
“A·dok damgnini soi ka·grikanio itihasni gita ong·baani kakketko, jatni daka rikaniko, sorkarini kamrango altubataniko, biapni gita maming bak ong·ani grianiko aro manderangni nangnikanirangko nichanggalaha ine chinga nikna man·aha aro Meghalaya sorkarini songe on·gipa regional committee-rangba sorkarina report-ko on·na skang, KHADC, Hima Nonglang, Reid Marweit, Nongbak A·king Nokma aro a·a nokgiparang baksa name agangrikchenganirang dongjaha,” ine dolbri NGO-rang parakatenba, mikkangchi iandakgipa kamrangni a·sel ding·chaogrikanirang dongjana gita regional committee-ni report-ko jinmana parakchina aro a·dok damgnini soi ka·grikgipa MoU-ko nipilchina mol·molatenga ine parakataha.
Assam a·doko napatenggipa Mallang Joipur, Mallang Salbari aro Mallang Huhuapara songo donggipa manderangni gimin talbate ma·sie ra·na gita revenue record aro census record-rangko name nipiltaienba, jinmana parakchina gitaba NGO-rang a·dok sorkario dabiangtaiaha.