TURA: Meghalaya Engineering Services Association (MESA)-ni gita chang 16-gipa, General meetingko, SMELC, Tura-o, October 15 tariko, katta bichongko “Towards Disaster Resilient Infrastructures in Meghalaya” ine done ong·atangaha. Tom·aniona, Chief Minister-ni Chief Adviser, Thomas A Sangma, Chief Guest ong·e sokbaaha.
Tom·anio agananiko dakengon, engineer-rangni a·doko namroro silroroanina gamchatgipa on·anirangko on·e dakchakenganina mittele, Thomas aganangaha. Uni aganani gitade, songsal aro science-ni bako, engnieer-rangan mangsonggipa bak ong·a.
A·doko nambatatna kam ka·anio aro technology-ni gita engineer-rang mangsonggipa on·gilaniko on·gipa ong·a ine agane, a·dok sorkarini gita masisogija a·selrangko chelchakna dingtanggipa rikanirangko rikna gita chanchienga ine aganangaha.
Tom·aniona re·baanio, MESA-ni sourvenir-koba chief guest oprake on·angaha. Guest of honor, PR Marwein , Meghalaya Public Service Commission (MPSC)-ni chairman aro PWD-ni secretary gitcham uni agananio a·doko mikkangchi nok aro dingtang dintang buildingrangko rikanirango nipiltaitaina nangjana gita, bilsi 50-na mangrakgipa building aro nokrangko rike on·a baksa engineer-rang manderangni namgnirangna kamrangko ka·na nanga ine aganangaha.
PWD-ni Secretary, TG Nengnong-ni aganani gitade, engineer-rangna dormaharangko on·anirang, gipin a·dokrangona bate komibatenga aro iarangko nipiltaina gita nanga.Dr. Hopeful Syiemiong ia bilsini, theme ba katta bichongo pangchake agananiko dakangaha, MESA-ni president, Donland Mawroh manderangko rim·chaksoani kattarangko aganangaha. PWD, Tura-ni Executive Engineer, CN Sangma mittelpilskaani kattarangko aganangaha.
