SHILLONG: Batanggimin bilsirango, COVID-19-chi, Meghalaya a·dok namen neng·nikatanirangko man·begenchimoba, 2022 bilsiode a·doko gipin a·dokrangoni ba gipin a·songrangoni re·bagipa manderang ba tourist-rang namen bang·bataha.
Indake, 2019 bilsio a·dokona chu·gimik lak 12.71 tourist-rang re·baaha aro uarangoni sak 25,800-de gipin a·songrangoni re·bagiparang ong·a. Indiba ia bilsini bakode dugnina batpile tourist-rang a·dokona re·baaha aro lak 15-rangni gitade manderang re·baaniko dakkuenga, ine Chief Secretary DP Wahlang aganangaha.
Wahlang-ni aganani gitade, Northeast-ni gipin a·dokrangona bate, tourist-rang Meghalaya a·dokona re·babatenga. Indiba mingsa namgijaniara, gipin a·songoni manderang sak 411-san ia bilsini bako a·dokona re·baiaha.
Chief Minister Conrad K Sangma-ni aganani gitade, Northeast-o donggipa a·dok gimikon uamang ge·sa tourist-rangni biap dake mesokna gita chanchienga.
Chief Minister-ni aganani gitade, tourist-rang, Tawang (Arunachal Pradesh), Kaziranga (Assam), Loktak Lake (Manipur) aro Shillong-ona changsa re·baanio napjoljolaniko dakenga. Uni ramako mesoke aganani gitade, biaprangko nina re·gipa tourist-rang package-ko ra·e biaprangko nina gita namnikbata maina package-ko ra·anio uamangna biap dingtangtangona neng·nikanigri sokna gita dakchaka.
Ma·mong sorkarini gitaba, ministry, DoNER, Tourism aro Culture-ni gita, Northeast-o donggipa bang·a biaprangkon namdapatna gita kamrangko ka·enga, ine CM aganangaha.
Uni aganani gitade, visa-na neng·nikani aro dingtang dingtang neng·nikanirangko sorkarini gita name tarie on·a nanggen. A·song gipinrang baksa nambate songre songabataniko on·a man·a gita sorkari cholrangkoba am·sandie on·a gita nanga. Jekai, Dhaka, Bhutan, Myanmar, Nepal aro Bangkok-rangona songrena cholrangko sorkari name tarie on·a gita nanga.
”Northeast-o donggipa airport-rangoni namnamgipa aro gipin a·songrangoni songjimarangona sildorengo songrena gita konta 1 ba kontasa atarangkosan nangaia. Uni gimin ua a·songrangoni an·chingni a·dokrangona rona re·baenggipa manderangna an·ching namgipa cholrangko on·a gita nanga,” ine ua aganangaha.
Meghalaya a·doko gitalgipa airport-rangko nikna man·genma ine singon, tarina gita miksonganirang donga indiba jedakgipa a·baoba tangka paisarangna neng·nikaniko man·aia uni gimin apsan daken chinga iakoba a·bachengna man·kujaenga, ine ua aganangaha.
