Tura: Mijal salni bako kobor ra·giparangna official-rangni parakatani gitade, Meghalaya a·dokni, West Garo Hilss district-o dakait ine potchipgipa manderangko silchidarerang baksa slaio jakkalgipa gulirang baksa police-rang rim·na man·aha.
Koborrangko man·e, West Garo Hills district-ni police, Sukrobar salni attamo, Phulbari police station-ni ningo ga·akgipa, Nikikona songo am·sandianirangko dakaha aro am·sandie sakgittam dakaitrangko rim·na man·aha.
Indake, police uamangoniko silchidarerang baksa slaini gulirangkoba man·aha.
West Garo Hills district-ni SP Vivekanand Singh Rathore-ni aganani gitade, police-rang donue agangipa koborrangko man·ani ja·man am·sandianiko dakaha.
”Chinga dosi donggipa sakgittam manderangko rim·aha aro uamangoniko, gesa pistol, gesa magazine, live ammunition-ni gegittam round aro chaka samgnigipa gari ML 08G-4295, registration ka·kugijagipa scooty bolsa, mobile phone gegni aro gegni SIM card-rangko man·aha,” ine Rathore aganangaha.
Indake rim·ako man·gipa manderangara, Silman R Marak (30), Elias Alom (24), aro Nur Hussain (22).
Agipi police official saksani aganani gita iani bidingo uamangni kosako badi ka·aha aro tal·bate masina gita am·sandianirangko dakgen.
