SHILLONG: Assam aro Meghalaya a·dokni simarango ong·enggipa golmalrangko namatna gita da·o gnigipa changna ja·kurangko de·chakatengon, skanggipa bako gita ‘dakgualanirang’ dongjachina aro kamrangko ka·anio pilak dolrangkon bak ong·atchina gita Khasi Students Union (KSU), Meghalaya sorkariko didiataha.
“Skanggipa bakode Assam aro Meghalaya a·dok damgnini soi ka·grikgipa Memorandum of Understanding (MoU)-ko bang·a dolrangan jegaltokaha aro songgrikanio manderangna ra·chakna man·gijani ong·aha. Uni gimin skanggipa bako dakgualaniko sorkari ma·sienba skie ra·aha ine chinga bebera·a aro da·o gnigipa bakode apsan dakgipa gualanirang dongjachina,” ine KSU-ni president Lambokstar Marngar parakataha.
Regional committee-rangko songna skangan KSU, a·dokni Chief Minister-ko gronge agangrikaha ine talataniko on·angengon, “A·dok damgnini simarango meligrikgijanirangko namatna kam ka·anio pilak dolrangkon aro mongsongbate sima jolrango donggipa songni nokni dilgiparangko aro songsalni dolrangkoba bak ong·atchina chinga sorkariko didiaha. Sima jolrango donggipa manderangni aro dilgiparangni nangnikani aro ma·sianirangko sorkari ra·na nangchongmota,” ine Marngar parakataha.
Kamrangko sikkele ka·jachina a·dok sorkariko didiatengon, simarango songdongenggipa aro dilgiparangni chanchianirangko ra·aniara namen nangchongmotgipa ong·ani gimin dingtang dingtang dolrangni ku·pattianirangko name nichina KSU-ni president, sorkariko didiataha.
A·dok damgnini simarango bangki dongkuenggipa biaprangko namatna kamrangko ka·chakatna gita adita salrangna skangsan a·dok sorkari, dolgittam regional committee-rangko songe donangahachim ine nikna man·a.
Ia dolgittam regional committee-rang, West Khasi Hills a·jani Langpih, Ri Bhoi a·jani Borduar, Nongwah-Mawtamur aro Block-II baksana West Jaintia Hills a·jani Psiar-Khanduli jolrangni bidingo tale am·sandianirangko dakna siengachim.
Meghalaya aro Assam a·dokni gisepo meligrikna man·jaenggipa biaprangoni da·o bangki dongkuenggipa damdok jolrangko namatna gita a·dok damgnini agangrikanio, ia sima jolrango songdongenggipa manderangni nangnikanirangkoba sorkari ra·gen ine adita salrangna skangsan, a·dokni Home Minister Lahkmen Rymbui, ku·rachakaniko on·angahachim.
Iani bidingo kobor ra·timgipa manderang baksa agangrikengon, indita bilsirangna a·dok damgnini simarango ong·enggipa golmalrangko namatna gita Meghalaya aro Assam a·dok damgnini sorkarirangan gisiko nange kamko ka·enga ine Rymbui parakatahachim.
“A·dok damgnini simarango ong·enggipa golmalrangko chinga sima jolrango songdongenggipa manderangni nangnikanirangko ra·chengesa namatna jotton ka·gen. Ia kamko ka·anio dingtang dingtang ja·kurangko de·na nangani gimin ian altua kam ong·jawa ine chinga ma·sia indiba manderangni nangnikanirangko ra·chengesa pilak kamrangkon ka·na chinga ku·rachakenga,” ine Home Minister parakatahachim.
