SHILLONG: Meghalaya a·doko Inner Line Permit (ILP)-ko ra·gatchenggijade rel garirangko a·dokona ra·baani bidingo chanchisrangjachina aro una batede a·doko lekka porako tang·doatna, chadamberangna janggi tangani cholrangko on·na aro uandakgipa nangchongmotgipa kamrangna gisik on·batchina gita Khasi Students Union (KSU), a·dok sorkariko didiataha.
“Sorkarini gisik aro chanchianirangko chinga ma·sina man·ja. Meghalaya a·dokona niam gri napsrukanirang batroroengani gimin chinga changni chang a·dok sorkarina u·iate rakbatgipa niamrangko ra·gatchina mol·molahachim indiba da·alona kingkingan maming niamrang dongkujaenga,” ine Sonibar salo KSU-ni president Lambokstar Marngar parakataha.
A·doko rel garirangko jegalenggipa dolrangni nangnikanirangko sorkari namate, a·dokona rel garirangko ra·bana ja·kurangko de·angkugen ine a·dokni Chief Minister Conrad K Sangma-ni agangipa kattarangna KSU-ni president, ia kattarangko aganskaaha.
A·doko ILP-ko ra·gatani bidingo ma·mong sorkari baksa bilakbate agangrikchinasa KSU, a·dok sorkariko aganahachim indiba a·dokona rel garirangko ra·baani giminsa sorkari aganchae dongskaenga ineba Marngar parakataha.
A·dokona niam gri napsrukanirangko champengna ILP gita bilakgipa niamrangko ra·gatkujaskal a·dokona rel gari ra·napbaaniko KSU raken jegalangkugen ineba ua parakataha.
“Meghalaya a·dokna ILP-ko on·na ma·mong sorkari ku·rachakani ja·manosa chinga rel garirangko ra·baani gimin chanchirimna man·gen,” ine Marngar aganaha.
A·doko ILP-ko ra·gatkujaskal KSU, sorkari baksa je kamni giminba agan-chanchirimanio bakko ra·jawa ineba KSU-ni president parakataha.
“Uni gimin sorkari, rel garirangko gualchenge, ILP, education policy, chadamberangna janggi tangani cholrangko on·ani, Tourism aro uandakgipa dingtang dingtang kamrangko namdapatani bidingo chanchichengchina,” ine ua aganaha.
Meghalaya a·doko rel garirangko jegalenggipa dolrangni nangnikanirangko sorkari namate, kamrangko ka·angkugen ine Sukrobar salosan a·dokni Chief Minister aganahachim ine nikna man·a.
