TURA: South Tura constituency-ni ning·o donggipa Nikwatgre gittimo rama tarianiko champengani a·sel rama tarianiko dontongatpilaha ine songbadrango matnangatahani gimin Nikwatgre gittimni saksa Edonath Marak minggipa mandeni kosako South Tura-ni gitcham MLA John Leslee K Sangma kacharini gita ijahar ka·doangaha aro uni kosako matnanganirangna sakkirangko on·na man·jagenchimode gong kror 1 tangkako dai gamna nanggen ine mikrakataniko on·ataha.
Ia legal notice ba ainni gita u·iataniko John Leslee Sangma-ni pal, uni ukil ML Thangal, Nikwatgre gittimni Edonath Marak-na seataha aro gitcham MLA-ni kosako tol·e matnangahani gimin uni kosako IPC 1860-ni Section 499-o pangchake ijahar ka·aha ine parakataha.
South Tura constituency-ni ning·o donggipa Nikwatgre gittimo rama tarianiko gitcham MLA John Leslee K Sangma champengatani a·sel da·o ia rama tarianiko dontongaha ine adita salrangna skangsan, Nikwatgre gittimni Edonath Marak, kobor setimgiparangna seachi parakatahachim.
Ia ramako tarichina gita gittimni manderang, gitcham MLA John Leslee K Sangma-ni somoion dabitokahachim indiba ua gittimni nanganirangko chu·sokatani pal da·o rama tarie on·ako man·paengoba batesa ua rama tariako champengskaaha ineba Marak matnangatahachim.
Indake ong·engon, ia mandeni matnanganiko South Tura-ni gitcham MLA jegalatskaenba, ia rama tarianiko ua champenga dongjachim indiba ia ramako tariani bidingo ua ma·sie ra·na gitasa a·songni on·gimin bilo pangchake RTI-kosa ka·aiahachim ine parakataha.
Uni RTI ka·aniko man·soani ja·man rama tarianiko PWD dontongataha ong·ode department-ni manderangan, ia rama tarianiko dontongatani bidingo gittimni manderangna talataniko on·na nanga ineba South Tura-ni gitcham MLA John Leslee Sangma parakataha.
Uni MLA ong·engmiting somoio ua ia ramako tarie on·na gisiko nangjaha ine matnanganina talataniko on·angskaengon, Tura Municipal Board-ni record ba see rakkianirangko am·sandie nigenchimode ia gittimna skanggipa ramako uni MLA ong·engmiting somoion tariaha aro ia rama da·alonan dongengkua ine nikna man·gen ine Sangma parakataha.
Gitcham MLA-ni kosako iandake matnanganirangna antisani gisepon sakkirangko mesokchina, ong·jaode gitcham MLA-ko gronge kemako bi·enba, songbad aro social media-rango iani bidingo talataniko on·china gita u·iatengon, ia u·iatanirangko chu·sokatna man·jagenchimode gong kror 1 tangkako dai gamna nanggen ine John Leslee Sangma-ni ukil mikrakataniko on·ataha.