SHILLONG: Congress dolo apsan kam ka·rimska membor-rang maini gimin uko wate kataha, name am·sandichina gita Meghalaya Pradesh Congress Committee (MPCC)-ni president Vincent Pala-ko UDP-ni MLA aro Meghalaya a·dokni Home Minister Lahkmen Rymbui aganaha.
UDP-ko ka·pong dakgipa dol ine matnangahani gimin Meghalaya a·doko Congress dolni MLA-rang wate kattokahachim, name sandichina gita MPCC-ni president-ko UDP-ni dilgipa aro Home Minister Lahkmen Rymbui ra·biatskaaha.
Rymbui-ni parakatani gitade, Pala-ni a·dokona re·baa bakan Congress dolni pilak MLA-rangan ong·kate kattokahachim aro re·baenggipa 2023 bilsini Assembly election-o Congress doloni susana seokako man·gipa candidate-rangba gipin dolrangchi kattokskaengahachim.
“Pala-ni a·dok politics-o re·baa bakan Congress dol pilak MLA-rangko gimaataha aro re·baenggipa 2023 bilsini Assembly election-o susana gita seokako man·gipa candidate-rangba gipin dolrangchi katnaptokskaengaha,” ine Rymbui aganaha.
Delhi-oni re·bae a·doko ong·enggipa obostarangko name ma·sichenggija matnange agananiara namen kragijani ong·a ineba Rymbui parakataha.
“2018 bilsio Congress dol dal·batsranggipa dol ong·achim indiba da·o mamingba dongsrangjaha. Sani a·sel ia obostaona sokaha? Ia pilakan uni (Pala)-ni a·selan ong·a,” ine UDP MLA aganaha.
MDA sorkarini ning·o UDP dolan tangka jakkalsretbatgipa dol ong·a ine Pala-ni matnange agangipa kattarangni gimin janapatskaengon, State Assembly-o MLA dongsranggijagipa dolni matnange agananina ua mamingkoba aganchakna sikja ine Rymbui parakataha.
“Uamango saksa sakgni MLA-rang dongchengkukan, unode anga una aganchakaniko on·gen indiba da·o dipetde uni agananirangara gimikan zero-sa ong·aia. Ua (Pala) ramarango agane rojaode bano aganskagen? Assembly-osa Congress ku·rangko on·na nanga indiba da·o una aganchakaniko on·anide a·doko dongsranggijagipa dolna aganchakani gita ong·aigen,” ine ua aganaha.
