SHILLONG: Meghalaya a·dokni private company-rango a·dokni chadamberangna kamrangko ka·e cha·ani cholrangko on·na gita a·dok sorkari niamko ra·gate on·kujaengani gimin jegale Bristibar salo, Hynniewtrep National Youth Movement (HNYM) dolni gita jinma re·jomaniko ong·atangaha.
Jinma re·jomaniko Shillong Civil Hospital point-oni a·bachengataha aro State Secretariat gita wenbae apsan biapon matchotataha.
Jinma re·jomengmiting somoio HNYM-ni membor-rang aro re·jomanio bak ra·pagipa bang·bea manderang, a·doko chadamberangna kamrangko ka·e cha·na cholrangko on·jaengani gimin sorkarini kosako jegale chrik a·bokanirangkoba dakangaha.
Jinma re·joma matchotani ja·mano, HNYM-ni joint secretary Wyraiwan Sohtun, kobor ra·timgipa manderangna agan-talataniko on·angengon, iani bidingo uamang 2021 bilsion sorkarina memorandum-ko on·manahachim indiba da·alonan maming ja·kurangko de·kujaengani gimin gisik ra·attaianiko on·na gita jinma re·jomaniko ong·ataha ine parakataha.
Ia salni bako bang·gija manderangsan re·jomanio bakko ra·angaha indiba uamangni dabianiko sorkari knachakgija dongangkugenchimode sorkarini kosako bilakbate jingjengatanirangko dakanggen ineba HNYM-ni joint secretary parakataha.
