Tura jillani footpath-rango tarigipa pul ge·chakanirangko ra·galchina gitcham MLA didia

TURA: Tura jillani footpath-rango pul ge·chakani aro electric post-rangko songaniara ja·achi re·ruraenggipa manderangna aro mongsongbate skulrangchi re·enggipa bi·sarangna man·dikani aro kenchakna nangani ong·enga ine Tura-ni gitcham MLA John Leslee K Sangma parakatenba, ia pul ge·chakani aro electric post-rangko ra·galpilchina gita West Garo Hills a·jani Deputy Commissioner-na sedoataha.
Sangma-ni Deputy Commissioner-na sedoatani gitade, Tura jillani mongsonggipa biaprang, jekai Ringrey, Chandmary, Hawakhana, Tura Bazar, Circuit House junction, Araimile aro uandakgipa dingtang dingtang biaprango footpath-rang ramani paksamsaosan dongaia aro ia ramarangara namen apchonbegipasa ong·genchimoba ia footpath-rango pul ge·chakani aro electric post-rangko donahani a·sel manderang re·ruraanirango bilongen neng·nikanirangko chagrongna nangtokengachim.
“Tura jillani ramarangko taridapanio District Urban Affairs aro PWD, name survey ka·chenggijasa aro biapna meliama melijawa uko nichenggijasa tariaha gita nika. Ia sal somoirango gari gorarang bang·dugaengahani a·sel ramarang apchangket ong·aniko nikna man·engon, manderangni ja·achi re·enggipa footpath-rango pul ge·ani aro electric post-rangko songaniara re·ruraenggipa manderangna bate neng·nikanikosa ra·baani gita ong·enga,” ine Sangma parakatenba, manderangni namgnina ia pul ge·chakani aro electric post-rangko ra·galpilchina Deputy Commissioner-ko didiataha.
Footpath-rango angipa tiles-rangara rimilgipasa ong·ani gimin wachini somoirangode re·ruraenggipa manderangna kenchakna nangani ong·enga ineba Tura-ni gitcham MLA parakataha.
Tura-o apchonbatsranggipa ramarangoni dilsara Christian Girls Higher Secondary School sambao donggipa rama ong·a ine janapatengon, ia ramani footpath-ko gital tarina gita gitcham footpath-ko pe·galani ja·manba ia ramani gitcham railing pipe-rangko antisa batpilahaoba ra·galkujaenga aro ia ramao da·o ro·ongrang dane donengani a·sel re·ruraenggipa manderangna kenchakna nangani ong·engoba nirok sandianirang dongjaenga ine Sangma, an·tangni suk ong·gijaniko parakataha.