SHILLONG: Batanggimin bilsibongana National People’s Party (NPP)-chi dilenggipa Meghalaya Democratic Alliance (MDA) sorkariko chalaianio dingtang dingtang kamrangko ka·sretanina aro tangka paisarangko jakkalsretanina matnanganirangko man·engon, da·o United Democratic Party (UDP) dolde, iandakgipa matnanganirangko man·aoni an·tangtangko chel·e dongskana jotton ka·engaha aro re·baenggipa 2023 bilsini Assembly election-ni ja·manoba NPP baksa bakrimtaina gisiko nanganirang dongja gita mesokskaengaha.
Iani bidingo kobor ra·timgipa manderang baksa agangrikengon, uamang NPP baksa bakrimtaiani cholrang dongjawaha gita nikenga aro election-na skangba uamang gipin political dolrang baksa bakrimna miksonganirang dongjaengani gimin an·tangarian election-o susana miksongenga ine Robibar salo, UDP-ni general secretary Jemino Mawthoh parakataha.
“Chinga ia chang election-o nangana bate seat-rangko chegenchimode NPP baksa bakrimna nangani kattaan dongjawaha,” ine Mawthoh aganaha.
MDA sorkarini kosako tangka paisarangko jakkalsretanina aro dingtang dingtang kamrangko ka·sretanina matnanganirangko man·engani gimin manderangni mikkango UDP-ni mikkimko ra·ongala gita ong·genma ine sing·on, UDP dolde MDA-ni chonbegipa bak gitasan ong·paaia aro MDA-o dal·dalgipa dolrangan dongani gimin UDP-de maming dingtanganiko ra·bana man·ja ine Mawthoh parakataha.
Maiba kamrango ong·gija dakanirangko nikgenchimode UDP-ba pangnan ku·rangko on·rongaia ine janapatengon, kamrangko ka·anio ong·gija dakanirang aro tangka paisa jakkalsretanirang donggenchimode, iandakgipa kamrangni kosako rakgipa ja·kurangko de·na nanga ine UDP-ni general secretary parakataha.
Dingtang dingtang kamrangni bidingo inquiry dakanirangko ta·rakatchina sorkariko didiatengon, sakoba uamang chel·chakna jotton ka·genchimoba UDP-de maming namgniko man·jawa aro bang·a changon sorkarini ong·gija dakanirangna UDP-sa biming man·rongaha ine Mawthoh parakataha.
“Sorkariko sawa re·dilenga aro sawarang kamrangko ka·enga, uko manderang ma·sina nanga. Chinga sorkario chonbegipa baksan ong·aia,” ine ua aganaha.
Re·baenggipa 2023 bilsiode uamangsa sorkariko dilna nangnikenga ineba UDP-ni general secretary parakataha.
