TURA: Re·anggipa Sonibar salo, South West Garo Hills a·jani police-rang, Ampati police station-ni ning·o donggipa Julgaon joloniko gram 150 ong·gipa Yaba tablet-rangko rim·na man·aha.
Police-rangni u·iatani gitade, ia drugs ba pekatgipa samrangko badingna ra·angenggipa mande sakgni, ua biaponi joke katna man·aha.
Pekatgipa samrangko badingenggipa manderang, Mankachar-oni Ampati-chipakna re·angenga ine koborko man·soani ja·man Julgaon jolo police-rang, re·ruaenggipa garirangko nirikkion, motorcycle-o re·baenggipa mande sakgniko dongdipatna jotton ka·ahachim indiba ia manderang, police-rangko nikon, sambao donggipa buringchi kate jokna jotton ka·aha. Police-rang, ia manderangko rikna a·bachengon, ia manderang an·tangtangni motorcycle-ko metre 300-mang chel·gipa biapo gale ua biaponi jokangaha.
Ia mande sakgnini gale katanggipa ML-08D 1703 motorcycle-oniko am·sandion police-rang, ia motorcycle-oniko gram 150 ong·gipa rong 90 Yaba tablet-rangko man·aha ine police-rang parakataha.
