SHILLONG: India a·songni Prime Minister Narendra Modi-ni dilanichi, salgro salaram a·dokrango bang·en namdapataniko nikna man·aha ine Sonibar salo, Union Law & Justice Minister Kiren Rijiju, SRGT parking lot-o ong·atanggipa Rozgar Mela-o a·kangataha.
“A·songni Prime Minister, salgro salaram a·dokrangko mongsonggipa ong·e donenba kamrangko ka·aha aro an·ching ia jolrango bang·en dingtanganiko nikna man·aha. Ia jolrango ka·sinsinsa namroro silroroanirang sokbaengachim indiba da·alo ia jolrango ta·raken namroro silroroani sokbaaha,” ine Rijiju, salgro salaram a·dokrango rama jal·langrangko ta·raken tarie on·enggipani gimin aganaha.
Rijiju-ni aganani gitade, skango Shillong-kosa salgro salaram jolni skotong songjinmani dake donahani gimin ia songjinmaosan dingtanganiko nikna man·aiachim indiba da·ororode salgro salaramni pilak biaprangon namroro silroroaniko nikna man·engahachim.
“Shillong songjinmako British sorkarian skotong songjinma dake songe donangahani gimin chengode ia songjinmaosan dingtanganiko nikna man·aiachim indiba da·alo an·ching Shillong songjinmaoni ong·kate gipin biaprangona re·roroe nigenchimode Prime Minister-ni dilanichi ia pilak biaprangon dingtanganiko nikna man·engaha,” ine ua aganaha.
Mikkangchiba ma·mong sorkari, salgro salaramni pilak biaprangon namroro silroroaniko ra·bana kamko ka·angkugen ineba Union Minister parakataha.
