SHILLONG: ‘Sitrang’ balminduri balanganichi neng·nikanirangko man·enggipa a·dokni dingtang dingtang biaprango donggipa nokdangrangna ta·raken Gratuitous Relief-ko on·china gita Mongolbar salo, a·dokni Chief Minister Conrad K Sangma, deputy commissioner-rangna ge·etaniko on·ataha.
Mongolbar salo ua, balminduri balanichi ong·anggipa obostarangni gimin ma·sie ra·na gita dingtang dingtang a·jani deputy commissioner-rang baksa video conferencing-ko dake chanchirimangaha aro ia chanchirimanio ua dingtang dingtang a·jani deputy commissioner-rangna ge·etaniko on·ataha.
Bay of Bengal-o ‘Sitrang’ balminduri balbaanichi, salgro salaram a·dokrangonaba ia balminduri sokbaahachim aro uandaken Sombar salode a·dokni dingtang dingtang biaprango mikka baksana ta·rakbegipa balwarangni balaniko nikna gita man·ahachim.
Balminduri balani West Garo Hills aro South Garo Hills a·jarango bilongbatangaha aro ia damgni a·jarangon bang·en bolrangni be·aniko aro nok-jamrangni nosto ong·anirangko nikna gita man·angahachim.
Indake ong·engon, chief minister baksa video conference gita tom·e chanchirimanio dingtang dingtang a·jani deputy commissioner-rang talataniko on·angengon, balminduri balanganichi badiaba badiaba biaprango bol wa·arang be·dape ramarang champengatako man·na nangaha, bijoli silitingrang chottome bijoliko man·tokjaha aro mitam biaprangode nok-jamrang pe·ako man·e, bang·a nokdangrangan nok-jam gri ong·atako man·na nangtokaha ine parakataha.
Deputy commissioner-rangni chief minister-na talate on·angani gitade, Sombar salo mikkarang dontonggija waangani a·sel Shillong songjinmaoba chi bananirangko nikna man·taiaha aro East Khasi Hills baksana South Garo Hills a·jaoba mande sakgniko bijoli salaha.
Iana skang, ia tom·aniko ong·atani bidingo a·dokni Chief Minister, deputy commissioner-rangna talataniko on·angengon, balminduri balanio baditana kingking nangchakeaniko man·aha aro nangchakeako man·gipa biaprango ta·raken dakchakanirangko on·china deputy commissioner-rangko didiataha. Balminduri balanichi bang·a biaprangon bijolirangko man·pilkujaengani gimin ia biaprango ta·raken bijoliko on·pilna gita kamko ka·china gita ua MeECL-ni official-rangkoba ge·etangaha.
Duko ga·akenggipa nokdangrangna, NDRF-ni dongimin niamrango pangchake Gratuitous Relief-ko ta·raken on·china gitaba Chief Minister, ge·etaniko on·ataha.