TURA: Jal Jeevan Mission (JJM)-ni kamna Meghalaya a·dokba award-ko man·pilahaoba bang·a songrangon chi pipe-rangni soke man·gijaniko aro manderangni chi man·gijaniko nikna man·engkua aro iandakgipa songrangoni East Garo Hills a·jaoba damsa dongengpiti.
Ia songara East Garo Hills a·jani Rongjeng samba jolo donggipa Imsamdrop song ong·a aro jolo songdongenggipa manderangni parakatani gitade, ia songo JJM-ni kamko chu·gimik matchotaha ine a·kangengoba, songni bang·bata nokdangrangonan chi pipe-rang sokangkuja aro chi pipe-rangko man·gimin nokdangrangba da·alonan chi tingtotsakoba man·kujaengachim.
Jolo songdongenggipa manderangni parakatani gitade, Imsamdrop songo JJM-ni kamko ia bilsini gisepo saksa Sahidur Rehman minggipa contractor-na on·ahachim aro ia kamna gong lak 41-mangko una chame on·ahachim. Ia songo JJM-ni kamko matchotaha ine ua a·kangengoba, bang·bata nokdangrangan chi pipe-rangko man·kujaengachim aro chi pipe-rang soke man·gipa nokdangrangba chikon man·skakujaengachim.
Ia kamko matchotaha ine mesokna gita PHE-ni overseer, songni dilgiparangko cha·bokaha ineba songni manderang matnangataha.
“Kam matchotgipani lekkani kamna ia songni Village Water & Sanitation Committee (VWSC)-ni president aro secretary-ko uamangni stamp-rangko on·echina PHE-ni overseer aganataha indiba uamang an·tangtangni stamp-rangko on·eon, ia project-ko matchotaha ine mesokna gita uamangni stamp-rangko jakkalskaaha,” ine songni sordar parakataha.
President aro secretary-ni stamp-rang baksana uamangni soirangkoba department, niam gri ra·aha ineba songni sordar parakataha.
“Darangba ia songo ka·enggipa JJM-ni kamrangko nina gita re·bajaha aro uandaken ia kamko ka·gipa contractor, official-rang baksa chingko cha·bokaha. Da·alona kingkingan chinga ia JJM-ni chi tingtotsakoba man·kujaenga,” ine songni sordar parakataha.