Gaming Act-ko ra·galna gita segimin niamko changgipin Cabinet tom·aona ra·bagen: CM

SHILLONG: Meghalaya Regulation of Gaming Act 2021-ko ra·galpilna gita segimin niamko da·o changgipin Cabinet tom·aniona ra·bagnok ine Budbar salo, a·dokni Chief Minister Conrad K Sangma parakataha.
“Gaming Act-ko ra·galpilna gita segimin niamni gimin chanchirimna gita da·o changgipin Cabinet tom·aniona ra·bagnok,” ine Sangma, kobor ra·timgiparangna parakataha.
Meghalaya a·doko toromni dilgipa dolrangko man·chape dingtang dingtang dolrang jegalgrimtokahani gimin Meghalaya Regulation of Gaming Act 2021-ko ra·galpilna gita NPP-chi dilenggipa MDA sorkari tik ka·manahachim ine nikna man·a.
Ia Gaming Act-ko ra·galpilna gita draft ordinance-ko uni department tariengaha ine adita salrangna skangsan a·dokni Taxation Minister James PK Sangma parakatahachim.
“Da·o dipet Assembly-o session-ko ong·atkujaengani gimin Gaming Act-ko ra·galpilna gita chinga niamko tarina nangenga,” ine Minister aganahachim.
Taxation Minister-ni parakatani gitade, niamrangko ra·galpilaniara gital Act ba niamko tariana bate kamrang rakbatachim.
“Ia act ba niamko ra·galpilani ja·man maming man·dikna nanganirang dongjana gita chinga ia draft ordinance-ko simsakani gnangsa tarina nangenga,” ine ua aganaha.
Gaming Act-ko ra·gatanichi a·doko ong·gija dakgipa kamrang batroronaba gnang ine torom dolrangko man·chape dingtang dingtang dolrang jegaltokahani gimin Meghalaya Regulation of Gaming Act 2021-ko a·doko NPP-chi dilenggipa MDA sorkari ra·galpilna tik ka·angaha ine Sangma parakatahachim.
“Meghalaya a·doko tourism-ko tang·doatna, kajina man·aniko tang·doatna aro a·doko songdongenggipa manderangna kam ka·e cha·ani cholrangko on·na gitasa Meghalaya Regulation of Gaming Act 2021-ko re·anggipa bilsio angni dilanichi Meghalaya sorkarini Taxation Department ra·gate on·ahachim aro ia niamara Meghalaya a·doko joa kal·aniko niamo ong·atna aro niamrangko donna miksonge tarigipa Act ba niam ong·achim. Casino-rangkoba gipin biaprangoni Meghalaya a·dokona re·baenggipa manderangnasa kulina miksonganirang dongachim. Indake ong·genchimoba, batanggimin jarango dingtang dingtang dolrang, songsalni namgnina chanchie ia Act ba niamko jegalna a·bachengaha aro angni dingtang dingtang toromni dolrang, NGO-rang, songko nokko dilenggiparang, chadambe dolrang aro uandakgipa dingtang dingtang dolrang baksa chanchirimanio pilakan ia niamko jegaltokahani gimin sorkari, pilakni namgnina chanchie ia Meghalaya Regulation of Gaming Act 2021-ko ra·galpilna nangnikaha,” ine Taxation Minister parakatahachim.