TURA: An·tangni kosako ka·gipa case-rangni bidingo rim·ako man·gipa Tura-ni MDC Bernard N Marak, da·al Bristibar salni bako Meghalaya High Court-o ijahar ka·na sienga ine kobor on·aha.
Iani bidingo kobor ra·timgiparangna talataniko on·angengon, Tura-ni MDC Bernard Marak-ni kosako ka·gipa gitcham gital pilak case-rangan uno maming nangchakeani dongjachim ine Marak-ni ukil, Budbar attamo parakataha.
“Marak-ni kosako ka·gipa gitcham gital pilak case-rangan uo maming nangchakeani donggijagipa case-rangsan ong·aia aro iakoba chingna u·iatchengani grisa ka·aha. Uni kosako baita ming case-rang bangki dongkuenga chinga a·dokoniko ma·sina sikenga,” ine Marak-ni ukil aganaha.
Ia ukil-ni parakatani gitade, High Court-o jaminna dorgasto gale, jaminko man·ani cholrang donggenchimoba, uni kosako sorkari, gital case-rangko segatdapdapahachim.
“Bernard-ni jail-o dongengmiting somoio uni kosako gimik mingbonga case-rangko segataha aro ia case mingsaoba una maming u·iatanirang dongjaha,” ine Marak-ni ukil aganaha.
Tura MDC-ni kosako da·o minggni case-rang Tura court-o bangki dongkuenga ine janapatengon, ia minggni case-rangan gitchamsa ong·a aro ia case-o ua maming jak dongjachim ine ukil parakataha.
“Ia case-ara 2001 bilsini case-sa ong·a aro ia case-o mongsonggipa ong·e dosi channa man·gipa mandean siangpilaha. Ia case-oba Marak-ko bak ong·ate pattoko donataha aro iani bidingo chinga da·al court-o hearing-ko dakaniona re·angenga,” ine ua aganaha.
Indake ong·engon, POCSO bail-naba Tura-ni MDC dorgastoko galaha aro iani bidingo mikkang antio hearing-ko dakangnaba gnang ine Marak-ni ukil parakataha.
Tura Edenbari-o donggipa ‘Rimpu Bagan’-o me·a me·chikrangko ong·gija dake rona on·enga ine matnangako man·gipa Tura-ni MDC aro BJP Meghalaya-ni state vice president Bernard Rimpu N Marak-ko UP a·doko rim·ani ja·man July jani 29 tariko skanggipa changna kachario mikkangpaatahachim.
An·tangko bame on·china u·iatani ja·manoba katchipe dongahani gimin aro ia bilsini February jao me·chik bi·sa saksako uni bagano drae til·ekgipani bidingo District Sessions Court-ni gita uni kosako non-bailable arrest warrant-ko on·ahani gimin police-rang, uko rim·china gita a·song gimikni police station-rangna u·iataniko on·atani ja·man Tura-ni BJP MDC aro BJP-ni Meghalaya state vice president-ko Uttar Pradesh a·dokni Hapur a·jaoniko police-rang rim·na man·ahachim.
Marak-ko rim·ani ja·manoba police-rang, Rimpu Bagan-ona re·ange am·sandianirangko daktaion, gopretna jakkalgipa bosturangko aro adita silchidarerangkoba man·aha ineba police-rang parakatahachim.
