SHILLONG: Meghalaya a·doko bijoli chu·onggijaniko namatna gita a·dok sorkari, 50 MW Wah Umiam Stage-I aro 100 MW Wah Umiam Stage-II Hydro Electric Project-rangna NEEPCO baksa songgigrikanio soi ka·angaha.
A·dokni Deputy Chief Minister aro Power Minister ong·enggipa Prestone Tynsong-ni parakatani gitade, skangonin a·doko bijoli chu·ongjae neng·nikanirangko chagrongna nangengachim aro a·doko 650 MW bijoliko nangengon, 350 megawatt bijolimangkoba a·doko bikotna man·jaengachim.
“A·doko 50 percent-ni gita bijoli chu·ongjaenga aro da·o NEEPCO baksa songgigrikanichi ia neng·nikaniko namatna ka·dongenga,” ine Tynsong aganaha.
1984 bilsionin Assam-Meghalaya simao donggipa Kopili HEP-oniko a·dok indin bijoliko man·enga ine janapatengon, Wah Umiam-o ia minggni project-rangko a·bachengatna man·ahaode, minggittam project-rangoniko 13 percent bijoliko indin man·gnok ine Power Minister parakataha.
Bijoliko man·ani bilsio gong kror 65-mangni gita ong·gen aro ianoni 2 ba 3 percent-kode education, health aro ia project jolrango donggipa bading chiwalani kamrang baksana jolo namroro silroroatani kamrangna jakkalanggen ineba Tynsong parakataha.
A·doko bijolirangko bikotna man·jaengani gimin an·tangni suk ong·gijaniko parakatengon, mikkangchi iandakgipa project-rangna sorkari, songgigrikanirangko dake soi ka·angkugen ine Tynsong parakataha.
Indake ong·engon, bijolini kamrango NEEPCO kam changgipa aro ma·sigipa ong·ani gimin ia project-rangko ta·raken matchotatna man·gen ine NEEPCO-ni Director (Finance) B Maharana parakatskaaha.
